Олий Мажлис қонунчилик палатаси депутати Расул Кушербоев ўзининг Telegram’даги саҳифасида депутатларга беписанд муносабатда бўлаётган ҳокимликларни танқид остига олди. Қуйида депутатнинг фикрларини тўлиқлигича эътиборингизга ҳавола этамиз.
Айни кунларда депутатлар жойларда ўз сайловчилари билан учрашувлар ташкил этишмоқда. Қонунга мувофиқ, сайловчиларни учрашувлар ҳақида хабардор қилиб, ташкил этишда маҳаллий ҳокимликлар кўмак бериб келишмоқда.
Кўтаринки руҳда ўтаётган учрашувлардан фарқли равишда бугунги «провал»лар ҳақида ҳам тўхталиб, кўпчилик номидан ўз ташаккуримни билдириб ўтсам ёмон бўлмасди.
Аввало Зангиота туманининг Ўрта овул ҳудудидаги учрашувимиз ҳақиқатда жонли бўлиб, унда айниқса маҳаллий ҳокимият доирасида ҳал қилиниши лозим бўлган кўплаб масалалар бўлганлигини айтиб ўтиш керак. Лекин қанча илтимос қилмай ҳокимлик «ҳеч бўлмаса» деган вакилини ҳам юбормади учрашувга. Бу кичик провал учун уларга ташаккур. Одамлар билан учрашишга ё юз ё сабр чидамаётган бўлса керак.
Янгийўл шаҳридаги бутун бошли учрашув ҳақида одамларга хабар бермай, бўш зал билан учраштириб, провал қилишни уддасидан чиққан ҳокимликнинг масъул кадрларига эса алоҳида ташаккур. Бунақа шармандали вазиятни уюштириш унча мунчага эмас.
Президентимизнинг «Депутатга беписандлик халққа беписандлик» деган баҳога келишлари шунчаки бўлмаганлигини яна бир бор англаб турибман.
«Эҳ...бу ишлар депутатни обрўсини тўкиш ва бир четда туриб кулиш учун атайин уюштирилмаганлигига қаттиқ ишонгим келаяпти. Аслида сайловчилар биз билан шундоқ ҳам учрашишга тайёр ва нима бўлса ҳам учрашаверамиз», — дея фикрларига якун ясайди Расул Кушербаев.
Изоҳ (0)