2018 йилда Uzbekistan Airways авиакомпанияси қатор муваффақиятларга эришди, жумладан, 21 мингдан ортиқ рейсни амалга ошириб, йўловчи ташишда 3 миллионлик маррани забт этди, деб ёзади ЎзА.
2018 йилнинг май ойида Uzbekistan Airways Миллий авиакомпаниясининг авиапарки Boeing 787 Dreamliner билан тўлдирилди. Бу каби янги авлод самолётлари келтирилиши давом этади. Натижада Ўзбекистон авиакомпанияси МДҲда бундай ҳаво кемаларини эксплуатация қилувчи етакчи давлатлардан бирига айланади.
МАК фаолиятига бир қатор инновацион ишланмалар жорий қилинди. Хусусан, «Жойни танлаш» янги интерфаол хизмати йўлга қўйилди. Ушбу хизмат туфайли йўловчи самолёт бортида ўзи учун қулай бўлган жойни олдиндан брон қилиши мумкин. Uzbekistan Airways авиачипталарини брон ва харид қилиш бўйича расмий мобил илова амалиётга татбиқ этилди. Компания хизматлари учун онлайн тарзда тўловни амалга ошириш учун Visa ва UzCard банк карталаридан ташқари, MasterCard карталари ҳам қўлланилмоқда. Бу нафақат Ўзбекистон, балки чет эл фуқаролари учун ҳам харид тизимини янада осонлаштирди. Бундан ташқари, 2019 йил 1 февралдан бошлаб тўлов ва хизматларни амалга ошириш орқали балл тўплаш ҳисобидан авиакомпания парвозларидан бепул фойдаланиш имконини берадиган янги «НАК-NBU» кобренд банк картаси муомалага киритилади.
Миллий авиакомпания NETWОRК 2018 форумида авиация маркетинги соҳасида ЕвроОсиё мукофоти билан тақдирланди. «Ўзбекистон ҳаво йўллари» МАК «Домодедово», «Сочи», «Краснодар», «Казан» ва бошқа халқаро аэропортлар томонидан «Энг пунктуал авиакомпания» деб эътироф этилди.
«Ўзбекистон ҳаво йўллари» МАК Халқаро ҳаво транспорти ассоциацияси (IATA) билан ҳамкорликда 2018—2025 йилларда мамлакатда авиация хизматларини янада ривожлантириш бўйича ҳаракатлар режасини ишлаб чиқди. Ушбу режа IATA ассоциациясининг Навоий хабини халқаро юк ташувлар бозорида тарғиб қилиш бўйича маслаҳатлашувларни ўтказиш, мунтазам равишда тажриба ва ахборот алмашиш ҳамда ассоциациянинг авиация персонали – ходимларини ўқитишнинг амалий усулларини тақдим этиш, замонавий хизмат кўрсатиш стандартлари ва технологияларини синовдан ўтказишни назарда тутади.
Изоҳ (0)