HotelPro эксперти Дилшод Одилов «Дарё» учун тайёрлаётган туркум материалларида меҳмонхона бизнеси борасида маслаҳатлар беришда давом этади.
Ҳар бир янги календарь йили кейинги йил учун стратегик режа тузиш билан бошланиши керак. Натижа бериб келаётган маркетинг усулларини сақлаб қолган ҳолда, замон тезлашаётгани, ўзгараётганини ҳисобга олган ҳолда, янги трендларни ўрганиб, керакли усуллар билан тузилаётган маркетинг режаси бойитилиши зарур.
Қуйида маркетинг режасига киритилиши тавсия этиладиган баъзи тактикаларни келтириб ўтаман:
- ҳар бир мижозга индивидуал ёндашувни биринчи планга қўйинг;
- ижтимоий тармоқларнинг жуда муҳимлигини унутманг;
- маркетингни «стандарт саёҳатчи»га мўлжалламанг;
- реклама усулингизни кўриб чиқинг;
- маркетинг фаолиятингизнинг мобил телефонларда қандай кўринишига эътибор беринг;
- электрон почта орқали маркетинг қилишни тўхтатманг;
- онлайн сайёҳлик агентлари таклифларида энг юқорида ўринларда туришга ҳаракат қилинг;
- маркетинг стратегиянгизни доим кузатиб, баҳолаб боринг;
- рақобатчиларингизни муттасил кузатиб боринг;
- меҳмонхонани бошқаришда автоматлаштирилган дастурлардан самарали фойдаланинг.
Ижтимоий тадқиқотлар 80 фоиз мижоз, агар яхшироқ таклиф тушса, олдин ишлаб турган партнёрларини ўзгартиришга тайёрлигини кўрсатмоқда. 87 фоиз мижоз эса хизмат кўрсатувчи корхоналарнинг мижозга эътиборини янада кучайтириши керак деб ҳисоблайди. Етакчи иш бошқарувчиларнинг 94 фоизи мижоз садоқатини қозонишнинг энг муҳим омили ҳар бир мижозга индивидуал ёндашув деб ҳисоблайди.
Демак, юқорида келтириб ўтилган фоизлар даражасидаги мижозларни уларга индивидуал хизмат кўрсата олишингизга ишонтириб, ўз мижозингизга айлантириш имконияти мавжуд.
Бунинг учун мижозларга уларнинг соҳасини бошқа соҳаларга ўхшамаслигини, бу соҳанинг нозик тарафларини тушунишингизни ва керак бўлса стандарт хизматлардан ташқарига чиқа олишингизни етказиб беришингиз талаб этилади. Ҳар бир таклифингизда «биз сизни тушунамиз ва тадбирингизни сиз хоҳлагандай ўтказиб бера оламиз, меҳмонингизни сиз хоҳлагандай кутамиз» деган чақириқ бўлишига эътибор қаратиш керак.
Биргина Facebook ижтимоий тармоғининг ўзи 2 миллиард фаол фойдаланувчига эга ва бу кўрсаткич кундан кунга ортиб бормоқда. Ҳозирги пайтда 50 миллиондан кўп бизнес саҳифалари фаолият олиб бормоқда. Twitter, Instagram каби тармоқлар ҳам дунё бўйлаб миллиардлаб фойдаланувчиларга эга. Капитал салмоғи бир неча миллиард долларни ташкил этадиган корпорацияларнинг бу тармоқларда реклама бераётгани ҳам ижтимоий тармоқларнинг нақадар муҳимлигини яна бир бор кўрсатиб турибди. Қисқа, қизиқарли видеорекламалар борган сари оммалашмоқда. Ижтимоий тармоқлар рекламанинг креатив ва ўзгача бўлишига кенг имконият очиб беради.
Мижозларнинг ҳам меҳмонхона танлаш каналлари йилдан йилга кўпайиб бормоқда, ўша каналларда таклиф бераётган меҳмонхоналарнинг ўзи ҳам кўпайиб бормоқда. Кўпчилик тасаввуридаги стандарт турист учун таклифлар беради. Сиз бошқалардан ажралиб туришингиз учун меҳмонларни категорияларга ажратиб олиб, ҳар бир категорияга алоҳида маркетинг қилишингиз мақсадга мувофиқ бўлади. Масалан, бизнес мақсадида келадиган туристлар учун алоҳида рекламалар, саёҳатчи туристлар учун алоҳида таклифлар, ёшлар учун алоҳида, катталар учун алоҳида, оилавий саёҳатчилар учун алоҳида таклифлар ишлаб чиқиш лозим.
Интернет саҳифаларида учрайдиган баннерли, расмли рекламалар фойдаланувчиларнинг рекламага нисбатан иммунитети ортиб бораётгани туфайли фойдалилик даражасини йўқотиб бормоқда. Маълум бир қизиқишга эга фойдаланувчилар йиғилган реклама майдонида бериладиган реклама постлари, PR-мақолалар эса борган сари муҳимроқ аҳамият касб этиб бормоқда. Бир янгилик сайтининг қайсидир бир қисмида баннер шаклида турган, устига босганда сайтингизга ўтиб кетишга мўлжалланган рекламадан ўша янгилик сайтида сиз ҳақингизда берилган PR-мақола яхшироқ натижа беради.
Google тадқиқотларига кўра, саёҳатчиларнинг 51 фоизи саёҳатни смартфонлардан фойдаланган ҳолда режалаштиради. Рекламаларни мобил платформаси бор ресурсларга жойлашга кўпроқ эътибор қаратиш лозим. Мижозларнинг смартфонлар орқали хона ва хизматлар брон қилиш, маълумот олиш имкониятини кенгайтиринг. Telegram-ботлар, каналлар, мобил дастурлар ва сайт мобил кўринишининг қулайлиги муҳим аҳамиятга эга.
Электрон почта орқали маркетингни амалга ошириш мижозларни мақсадли танлаш, таклифни тўлиқ ва чиройли тарзда етказиб бериш имкониятини беради. Агар электрон почта орқали маркетинг тўғри йўлга қўйилса, мижозларингиз кейинги хатларингизни ҳам кузатиб борадиган, таклифларингизни кўздан қочирмайдиган бўлади.
Охирги икки йил ичида ҳам меҳмонхона сайтини, ҳам онлайн сайёҳлик агентлари сайтларини биргаликда кўриб чиқадиган мижозлар сони 48 фоиздан 30 фоизга тушгани, фақат онлайн сайёҳлик агентликлари сайтини кўриб танлов қиладиган мижозлар сони эса 48 фоиздан 60 фоизга кўтарилган. Демак, Booking, «Expedia.com», TripAdvisor каби ресурсларда юқори ўринларда туриш ва тўлиқ маълумот бериш нафақат кўпроқ мижоз келишига, балки ўзингиз ҳақингизда кўпроқ маълумот бериб олишга ҳам имконият яратади. Мижозлар сиз ҳақингизда қолдирган фикрлар қанчалик муҳим бўлса, уларга жавоб ёзиш ҳам шунчалик муҳим.
Меҳмонхонангизнинг асосий рақобатчиларини белгилаб олинг ва уларни кузатишни тўхтатманг. Мижозларингиз рақобатчингизга кетиб қолгандан кейин сабабини ўрганиб, ундан яхши таклиф қилиб қайтариб олишга ҳаракат қилгандан, рақобатчингиз таклиф қилган имкониятни таклиф қилиб, мижозни ўзингизда ушлаб қолиш осонроқ. Рақибларингиздан олдинда юришга ҳаракат қилинг, доимий изланишда бўлинг.
«Кимлар бизнинг меҳмонхонани танлаяпти? Нима учун бизнинг меҳмонхонани танлашяпти? Меҳмонлар қаерлардан келяпти?» деган саволлани доим ўзингизга беринг. Бу саволларга жавоб беришда сизга меҳмонхона бошқаруви учун фойдаланиладиган 1C Hotel, iStay, MC Fidelio, Opera каби махсус дастурлар асқатади. Керакли ҳисоботларни мунтазам кузатиб бориб, юқоридаги саволларга тўғри жавоб топиб, тўғри хулоса чиқарган менежерларнинг меҳмонхона бошқарувида юқори натижаларга эришиш имконияти анчагина ортади. Ушбу дастурлар ҳар бир меҳмоннинг индивидуал талабларини ҳам киритиб бориш имкониятига эга бўлгани учун, мижозлар хоҳишига мос маркетинг статегиялари белгилашни осонлаштиради ва меҳнатингиз самараси ортишига сабабчи бўлади.
Юқоридаги тактикалардан тўғри фойдаланиб, бизнесингизни янада ривожлантиришингизга тилакдошмиз.
Муаллиф фикри таҳририят нуқтаи назаридан фарқ қилиши мумкин.
Изоҳ (0)