Зўрлик ишлатишдан жабр кўрган аёлларга ёрдам кўрсатиш марказлари сони 155 тага етди

Ўзбекистон Хотин-қизлар қўмитасининг ҳудудий бўлинмалари ҳузурида 155 дан ортиқ зўрлик ишлатишдан жабр кўрган шахсларни реабилитация қилиш ва мослаштириш ҳамда ўз жонига қасд қилишнинг олдини олиш марказлари (шелтерлар) ташкил этилди. Бу ҳақда «Дарё»га қўмита матбуот хизмати хабар берди.

Президент қарори асосида ташкил этилган мазкур марказларда халқаро тажрибаларга таянган ҳолда зўрлик ишлатишдан жабр кўрган шахсларга манзилли, ўз вақтида ёрдам кўрсатиш ва уларни ҳимоя қилиш, ўз жонига қасд қилишга мойил хулқ-атвор пайдо бўлишига йўл қўймаслик ва унинг олдини олиш каби ишлар амалга оширилади.

Марказларда зўравонлик қурбонига айланган аёллар учун шошилинч руҳий, психотерапевтик, ҳуқуқий, зарурат бўлганда, бошқа қўшимча ёрдамлар кўрсатиш ишлари ташкил этилган.

Ана шундай оғир аҳволда қолган аёлларга ёрдам бериш мақсадида Республика доирасида ягона 1146 рақамли «Ишонч телефони» ишга туширилган.

Айтиш жоизки, мурожаатчи истагига кўра, унинг шахси ва мурожаати сир сақланиши кафолатланади.

Шелтерлар жойлашган аниқ манзиллар аёлларнинг хавфсизлигини таъминлаш мақсадида сир тутилади.

Қуйидаги ҳавола орқали уларнинг туман ва шаҳарлар кесимида жойлашуви билан танишиш мумкин.