Фарғонада электр таъминоти корхонаси томонидан марҳум фуқаро номига қарздорлик ёзилди

Фарғона вилояти Учкўприк туманида марҳум фуқаро номига қарздорлик ёзиш ҳолати қайд этилди, деб хабар берди ЎзА.

Тумандаги «Наврўз» МФЙга қарашли Жалоер қишлоғида яшовчи Ш.Мамажонов туман электр таъминоти корхонаси томонидан ҳисобланган қарздорлик тўғри ёки нотўғрилигини текшириб беришни сўраб, туман Истеъмолчилар ҳуқуқларини ҳимоя қилиш жамияти раиси номига ариза билан мурожаат қилди. Истеъмолчининг аризаси вилоят ҳудудий электр корхонаси директори О. Жалилов огоҳлигида туман электр таъминоти корхонасининг энергия сотиш бўлими бошлиғи Ш. Сатторов иштирокида Ўзбекистон Республикасининг «Истеъмолчилар ҳуқуқларини ҳимоя қилиш тўғрисида»ги ҳамда «Жисмоний ва юридик шахсларнинг мурожаатлари тўғрисида»ги Қонунлари асосида ўрганиб чиқилди.

Аризада келтирилган важларга аниқлик киритиш мақсадида туман электр таъминоти корхонасининг энергия сотиш бўлими бошлиғи ўринбосари Ш. Сатторов, маҳалла мутахассиси Д. Валиева ва туман Истеъмолчилар ҳуқуқларини ҳимоя қилиш жамияти мутахассислари Ш. Мамажонов хонадонига бориб вазиятни ўрганди.

Маълум бўлишича, истеъмолчи 5 231 049 абонент рақамидан фойдаланиб келаётганлиги, ҳисоблагич кўрсаткичи 1276 киловатт, давлат муҳри ҳам жойида экан.

«Шунингдек, ўрганиш жараёнида туман электр таъминоти корхонаси ПК-учёт ҳисоблаш дастурида Ш. Мамажоновнинг отаси Шокиржон Мамажоновга 5 231 013 абонент картаси очилган бўлиб, ушбу база ҳозирги кунга қадар ишлаб келаётгани ҳам аниқланди. Аслида эса аризачининг отаси 2000 йил 18 апрелда вафот этган.

Шундай бўлишига қарамай, бу фуқарога 2011 йилдан буён SMS хабар киритилганлиги ҳамда электр энергиясидан бўлган қарздорлик 958 055 сўмни ташкил қилганлиги ажабланарли.

Ушбу ҳолат атрофлича ўрганилиб, истеъмолчи Шарофиддин Мамажоновнинг отаси вафот этганлиги ҳамда унинг туман электр таъминоти корхонаси билан тузган шартномаси ва хонадон эгасининг шахси аниқланмаганлиги сабабли истеъмолчига ҳисобланган 958 055 сўм қарздорлик бартараф қилинди», — дейилади хабарда.

Ўз вазифасига совуққонлик билан муносабатда бўлган туман электр таъминоти корхонаси масъул ходимларига «Истеъмолчилар ҳуқуқларини ҳимоя қилиш тўғрисида»ги ҳамда «Жисмоний ва юридик шахсларнинг мурожаатлари тўғрисида»ги қонунлар мазмун-моҳияти батафсил тушунтириб берилди.