Шарқий ҳарбий округнинг Фарғона дала ўқув майдонида Мудофаа вазирлиги, вилоят ҳокимлиги, ёшлар иттифоқи вилоят кенгаши, мудофаага кўмаклашувчи «Ватанпарвар» ташкилоти билан ҳамкорликда «Ватан – муқаддас, уни ҳимоя қилиш шарафли бурчдир!» шиори остида ҳарбий-ватанпарварлик фестивали ўтказилди. Бу ҳақда «Дарё» мухбири Азизжон Эрматов хабар берди.
Фестивальда Шарқий ҳарбий округ қўшинлари қўмондони, ҳуқуқ-тартибот идоралари раҳбарлари, талабалар, ўқувчилар, ҳарбий хизматчилар ва уларнинг оила аъзолари, кенг жамоатчилик вакилларидан иборат 30 мингдан ортиқ иштирокчи қатнашди.
Дала ўқув майдони бўйлаб ҳарбий хизматчиларнинг саф кўриги ўтказилди. Ҳарбий техника намуналари, жанговар шайликка тайёрловчи қурол-аслаҳалар, аскарларнинг турмуш тарзини акс эттирувчи кўргазма ташкил этилди. Унда ёшлар ҳарбий техника, қурол-аслаха ва бошқа махсус воситалар билан яқиндан танишди. Ҳарбий хизматчилар замонавий ҳарбий техникаларнинг тактик-техник хусусиятлари ҳақида батафсил маълумот берди.
Шарқий ҳарбий округга қарашли ҳарбий қисмлар, миллий гвардия, ички ишлар, «Ватанпарвар» ташкилоти ўқув-спорт техника клуби томонидан Ўзбекистон армияси салоҳияти, ҳаво сарҳадлари қудрати ҳақида ҳарбий намойиш тайёрланди.
Ҳарбийлар томонидан ҳарбий-жанговар чиқишлар намойиш қилинди. Шарқий ҳарбий округ ҳарбий оркестри томонидан ҳарбий-ватанпарварлик мавзусида концерт дастури ўтказилди.
«Фестивальга ўзимиз ясаган авиа, ракета ва кема моделларини олиб келдик. Одатда, жанговар қуроллар ва ҳарбий техникаларни фақат телевизорда кўрардик. Бугун эса улардан қандай фойдаланиш бўйича ҳам маълумотга эга бўлдик. Бундай тадбирлар биз, ёшларни Ватанимиз, Қуролли Кучларимиз билан фахрланишга ундайди», – дейди Фарғона шаҳар «Ватанпарвар» ўқув-спорт техника клуби аъзоси Ҳикматилло Мелиқўзиев.
Изоҳ (0)