Самарқанд тумани «Мароқанд» деҳқон бозорининг филиали ҳисобланган автомобиль бозори ўрнида «Оқ Амур балиқлари» илмий-тадқиқот ўқув балиқчилик лабораторияси барпо этилади. Автомобиль бозори янги жойга кўчирилди, деб ёзади «Новости Узбекистана».
«Оқ Амур балиқлари» фермер хўжалиги вилоятдаги энг йирик балиқчилик хўжаликларидан бири ҳисобланади. У йил якунига қадар 450 тонна балиқни сотиш учун етказишни режалаштирмоқда. Фермер хўжалик раҳбарияти соҳани ривожлантиришда илғор технология, илмий ишланмалар, инновацион методикани қўллаш мақсадида балиқчилик бўйича илмий-тадқиқот ўқув лабораториясини ташкил этишга қарор қилди.
Умумий майдони 2 гектардан ошиқ бўлган автомобиль бозори ва унга туташ ҳудудда инновацион ўқув маркази ва лаборатория, балиқчилик бўйича лойиҳа ташкилоти биноси, юз кишилик меҳмонхона барпо этилади.
Фермер хўжалиги раҳбари Илҳом Ҳалимовнинг сўзларига қараганда, илмий-тадқиқот лабораториясига Хитой, Венгрия, Вьетнам ва Индонезиядан балиқчилик бўйича мутахассислар жалб этилади.
8 декабрь куни эски жойидан 200 метр масофада жойлашган автомобиль бозорининг очилиши бўлиб ўтди. Аввал мазкур бозор 1,6 гектар майдонда жойлашган бўлса, ҳозирда унинг майдони 4 гектардан ортиқ.
Изоҳ (0)