Google компанияси АҚШ мудофаа вазирлиги томонидан булут ҳисоблаш тизимини яратиш бўйича ўтказилаётган танловда иштирок этишдан бош тортди. Бу ҳақда «Корреспондент.net» хабар берди.
10 миллиард долларлик танлов Joint Enterprise Defense Infrastructure лойиҳаси устида ишлаш учун шартнома таклиф қилади. Лойиҳанинг мақсади ҳарбийларнинг ҳисоблаш қурилмаларини модернизация қилиш ҳисобланади. Танловда иштирок этиш учун Amazon ва Microsoft ҳам ариза топширган.
Google Пентагоннинг лойиҳаси сунъий интеллект технологиялари соҳасидаги тамойилларга мувофиқ келишига кафолат бермайди. Бундан ташқари, шартноманинг баъзи қисмлари Google’нинг давлат сертификатлари доирасидан чиқиб кетади.
Жорий йилнинг июнь ойида Google бош директори Сундар Пичаи компанияининг сунъий интеллектдан фойдаланиш соҳасидаги принципларини маълум қилган эди. Хусусан, Google қуроллар ёки одамларга зарар етказадиган технологиялар яратишда иштирок этмайди.