“Титаник” фильми ҳамда “Узуклар ҳукмдори” трилогияси юлдузи, британиялик актёр Бернард Ҳилл бир кам 80 ёшида вафот этди. Бу ҳақда актёрнинг агентига таяниб “Правила жизни” нашри хабар бермоқда.
Агентнинг маълум қилишича, актёр 5 май куни эрта тонгда вафот этган. Ўша куни кечқурун BBC Оnе телеканалида унинг иштирокидаги “Тhе Responder” фильмининг иккинчи фасли премьераси бўлиб ўтди.
BBC Drama директори Линдси Солт марҳум актёр ҳақида шундай деди:
Бернард Ҳилл кино саноатида ўчмас из қолдирди. Унинг ажойиб ва рамзий ролларга бой узоқ йиллик фаолияти актёрнинг профессионал истеъдодидан далолат беради.
Бернард Ҳилл 1944 йилда Манчестер шаҳрида кончилар оиласида туғилган. У 1970 йилларда кино ва телевидениеда фаолият бошлаган. 1982 йилда наркотик моддалар истеъмоли ва криминал ҳаётга ўралашиб қолган 3 йигит ҳақида ҳикоя қиладиган “Тhе black stuff” телесериалидаги ролидан кейин Буюк Британияда машҳурликка эришди.
Ҳилл “Титаник” фильмидаги капитан Эдвард Жон Смит ва “Узуклар ҳукмдори” трилогиясидаги қирол Теоден роллари билан машҳур. Актёр рафиқаси, америкалик актриса Марианна Ҳилл ва ўғли Габриэль билан Саффолкда истиқомат қилган.
Изоҳ (0)