МИБ Фарғонада табиий газ ва электр энергиясидан ноқонуний фойдаланувчиларни аниқлади

Мажбурий ижро бюроси Фарғона вилоят бошқармаси органларининг назорат тадбирлари жараёнида жойларда айрим кимсалар томонидан электр энергияси, табиий газ ва ичимлик суви тармоқларига қонунга хилоф равишда ўзбошимчалик билан уланиб олаётган ёки бошқа усуллар орқали давлат мулки талон-тарож қилинаётган ҳолатлар аниқланмоқда. Бу ҳақда ЎзА хабар берди.

Хусусан, Қувасой шаҳри ҳудудида жойлашган оҳак ишлаб чиқариш цехи иш юритувчиси С.Қ. ўз моддий манфаатини кўзлаб, қонуний ҳужжатлар асосида ишлатилаётган хумдонлардан ташқари, лойиҳада назарда тутилмаган қўшимча хумдон қурган. Унга 24 та ностандарт қўлбола горелка ўрнатиб, табиий газ тармоғига ўзбошимчалик билан ноқонуний улаб олган.

С.Қ. оҳак ишлаб чиқариш билан боғлиқ ҳужжатлари қонуний бўлгани сабабли «ҳеч ким билмайди ва кўрмайди» қабилида иш тутиб, қўшимча қуриб олинган хумдон ёрдамида моддий манфаат кўриб келаверган.

Бюронинг Қувасой шаҳар бўлими тезкор ходимлари томонидан ўтказилган тадбирлар жараёнида С.Қ.нинг «кўпроқ фойда топиш усули» фош қилинди ва давлатга етказилган 95 миллион сўмдан ортиқ моддий зарар ўрнини қоплаш учун бир ойлик ихтиёрий муддат берилди. С.Қ. жиноий жавобгарликка тортилишни хоҳламасдан, унга берилган ихтиёрий муддатда давлатга етказилган моддий зарарни тўлиқ қоплади.

Шунингдек, Қувасой шаҳрида яшовчи фуқаро Н.Ш. ўз раҳбарлигидаги фермер хўжалигида 35 гектар майдонда интенсив боғ ташкил этиб, 5 гектар ерда ғалла етиштириб келган. У фойдаланилган электр энергияси учун 1 миллион 750 минг сўм тўловни умуман амалга оширмасдан келгани сабабли 2015 йил ноябрь ойида тармоқдан узиб қўйилган.

Шундан сўнг Н.Ш. электр энергиясидан яширинча ўғрилик йўли билан фойдаланиш ҳақида жиноий режа тузади. Режани амалга оширишга киришиб, 2016 йил баҳор ойларида, суғориш мавсуми бошланган вақтда аҳоли фойдаланувида бўлган электр тармоғига ер майдонларининг аҳоли етиб бормайдиган чекка жойидан ноқонуний уланиб олиб, барча сув насосларини шу электр энергияси ҳисобидан ишлатишни йўлга қўйган.

Н.Ш. ўзининг бу жиноий ҳаракатлари билан давлатнинг 73 миллион сўмликдан ортиқ электр энергиясини ўмарган. Ўтказилган тадбирлар жараёнида Н.Ш.нинг қилмиши фош қилинди ва унга ҳам моддий зарарни қоплаш учун бир ойлик ихтиёрий муддат берилди. У ўз қоидабузарлиги оқибатида етказилган зарарни тўлиқ қоплади.

Юқоридаги ҳар икки ҳолатга нисбатан Мажбурий ижро бюроси томонидан қонуний қарор қабул қилинди.