«Қўқон-1912» «Пахтакор» билан дуранг ўйнаб, Топ-6 га кириш имкониятини пасайтириб юборди, «Металлург»да эса ғалаба

Бугун, 12 август санасида футбол бўйича Ўзбекистон Pepsi Суперлигасининг 21-тури якунига етади. Кун тақвимидан 3 та учрашувдан 2 таси якунига етди.

Кучли олтиликка киришга ҳаракат қилаётган «Металлург» жамоаси Бекободда «Қизилқум»ни қабул қилиб, 2:1 ҳисобида ғалаба қозонди. Мезбонлар таркибида Ислом Исоқжонов ҳамда Зоҳид Абдуллаев гол киритган бўлса, бу голга «Қизилқум»дан легионер футболчи Неманья Йованович жавоб берди, холос.

Шу тариқа мазкур ғалабадан сўнг 30 очкога эга бўлиб турган «Металлург» кучли олтиликка кириш учун катта қадам ташлади.

Турнинг марказий ўйини Қўқонда бўлиб ўтди. Мезбон «Қўқон-1912» жамоаси Тошкентнинг «Пахтакор» жамоасини қабул қилди. Учрашув томонларнинг 1:1 ҳисобидаги дуранг натижаси билан якунланди. 51-дақиқада Марко Милич автогол соҳиби бўлиб, «Пахтакор»нинг ҳисобда олдинган чиқиб олишини таъминлаган бўлса, 75-дақиқада Носир Отақўзиев қўқонликларга 1 очко келтирган голга муаллифлик қилди.

Мазкур дурангдан сўнг «Қўқон-1912» 28 очко билан мусобақа жадвалида 7-ўринга жойлашди.