Аму-Бухоро магистрал каналининг Шофиркон шохобчаси каналидан сув олиб Қизилтепа ва Кармана туманларидаги суғориладиган ер майдонларини сув билан таъминлаб келган «Навоий» насос станциясининг олтита агрегати реконструкциядан сўнг фойдаланишга топширилди, деб ёзади ЎзА.
Франция ҳукумати иштирокида насос станциясини қайта тиклаш лойиҳасининг амалга оширилиши асосан Маликчўл ҳудудининг 18 минг 100 гектар суғориладиган майдонлари ирригация тизимини яхшилаш имконини беради. Мазкур бунёдкорлик ишларининг биринчи босқичи муваффақиятли иш бошлади. Жорий йил якунига қадар яна олтита замонавий агрегат ишга туширилиши белгиланган.
Мазкур насос станцияси 1979 йилда ишга туширилган. Станция узоқ йиллар давомида фойдаланилиши натижасида уни реконструкция қилиш эҳтиёжи пайдо бўлди. Шунинг учун ушбу объектни қайта тиклаш бўйича йирик лойиҳа амалга оширилди.
Насос станциясидаги 12 та насос агрегатининг ҳар бирининг сув чиқариш қуввати сониясига 1,5 метр куб бўлса-да, эскиргани боис амалда сониясига 1,1 метр куб миқдорида сув чиқарар ва бунинг учун 2 минг кВт/соат электр энергияси сарфланар эди. Реконструкциядан кейин ўрнатилган янги насос агрегатининг сув чиқариш қуввати сониясига 1,9 метр куб бўлиб, бу миқдордаги сувни чиқариш учун 1 минг 800 кВт/соат электр энергияси сарфланади. Бу анчагина электр энергиясини тежаб қолиш имконини беради. Асосийси, умумий ҳосилдорлик гектарига ўртача 4—5 центнерга ошиб, қишлоқ хўжалиги инфратузилмаси яхшиланиши, фермер хўжаликларининг ривожланиши ва янги иш ўринлари яратилишида муҳим омил бўлади.
Изоҳ (0)