Украина Россия билан ҳаводан ҳужумларни тўхтатиш бўйича сулҳ тузишга тайёр. Бу ҳақда Украина президенти офиси раҳбари маслаҳатчиси Михаил Подоляк Corriere della Sera нашрига берган интервьюсида айтиб ўтган.
Подолякнинг сўзларига кўра, Вашингтон тўлиқ ўт очишни тўхтатишни, жумладан, ракета зарбалари ва дрон ҳужумларидан воз кечишни таклиф қилган.
“Бу сценарийлардан бирортаси Россия томонидан қабул қилинмади. Ҳаво ҳужумлари — бу Москванинг Украинага психологик босим ўтказиш учун қўллайдиган асосий воситаси. Россиянинг авиация кучлари ва дронлардан кенг миқёсда фойдаланиш имкониятидан воз кечиши даргумон. Бироқ Украина бу масалани муҳокама қилишга, бу сценарийни кўриб чиқишга тайёр. Биз буни реал музокаралар учун бошланғич босқич деб ҳисоблаймиз”, деган Подоляк.
Қайд этилишича, 5 август куни Америка президенти Дональд Трамп Украина ва Россияга ўт очишни зудлик билан тўхтатишни таклиф қилган эди. Трампнинг таклифи Владимир Зеленский томонидан қўллаб-қувватланган.
“Биз ўт очишни ва одамларнинг ўлдирилишини қандай тўхтатиш бўйича жуда кўп вариантларни синаб кўрдик. Биз Россияга фуқаролик ва энергетик инфратузилма объектларига ҳаводан ҳужум уюштирмасликни таклиф қилдик. Буларнинг барчаси россияликлар томонидан бузилди”, деган Зеленский.
Изоҳ (0)