Ўзбекистон ва Чехия ҳамкорлигининг шартномавий-ҳуқуқий асоси кенгайтирилади
Чехия пойтахти Прага шаҳрида 24—25 июль кунлари Ўзбекистон ва Чехия ташқи сиёсат идоралари юридик хизматларининг икки давлат ҳамкорлигининг шартномавий-ҳуқуқий асосини кенгайтириш имкониятларини муҳокама қилиш ҳамда имзоланган икки томонлама ҳужжатларни инвентаризация қилиш бўйича маслаҳатлашувлари бўлиб ўтди. Бу ҳақда ТИВ ахборот хизмати хабар берди.
Чехия томонидан маслаҳатлашувларда ТИВ Халқаро ҳуқуқ департаменти директори ўринбосари Милан Беранек бошчилигидаги делегация иштирок этди.
Учрашув доирасида бўлажак қўшма тадбирлар чоғида имзолашга ўз вақтида ва тегишлича тайёрлаш мақсадида томонлар ишлаб чиқаётган шартномаларнинг лойиҳалари кўриб чиқилди. Шунингдек, томонлар ҳамкорликнинг шартномавий-ҳуқуқий асосида турувчи ҳужжатларнинг мақомини белгилаш борасида ҳам келишиб олди.
Маслаҳатлашувлар чоғида мазкур Департамент директори Петр Валек билан ҳам учрашув бўлиб ўтди. Учрашувда умумий халқаро ҳуқуқнинг нормаларини шакллантириш истиқболлари, жумладан халқаро ҳуқуқ нормаларини илғор ривожлантириш ва кодификация қилиш масалалари билан шуғулланувчи кўп томонлама тузилма ва форматлардаги ҳамкорлик юзасидан фикр алмашилди.
