Самарқанд тумани адлия бўлими томонидан туман йўллардан фойдаланиш корхонасининг 20 нафар ишчиси олти ой давомида ойлик иш ҳақларини ололмаётганлиги тўғрисида мурожаат қилган. Адлия бўлими томонидан фуқароларнинг аризалари ўрганилиши натижасида ишчиларга тўланиши лозим бўлган 26 миллион 220 минг сўмлик ойлик иш ҳақлари ундириб берилди, деб хабар бермоқда «Дарё» мухбири Фарҳод Норбўтаев.
Адлия бўлими томонидан қисқа давр мобайнида аҳолидан келиб тушган 40 дан ортиқ мурожаат ўрганилиб, уларнинг 32 таси қаноатлантирилган. 20 та мурожаат асосида тегишли ташкилот ва масъул шахсларга таъсир чоралари кўрилган. Айрим мурожаатлар юзасидан фуқароларга ҳуқуқий тушунтиришлар берилиб, 2 марта тегишли тартибда ўрганишлар ўтказилди. Бундан ташқари, қисқа давр ичида 2400 та норматив ҳуқуқий ҳужжатлар давлат идораларига етказилди. Қонунчиликни такомиллаштириш юзасидан 2 та таклиф киритилган.
«Янги адлия бўлимларининг ташкил этилиши аҳоли учун вақт ва сарф-харажатни тежаш имконини берди. Айни вақтда бўлимимизда 4 нафар ҳуқуқшунос меҳнат қилмоқда. Аҳолига ҳуқуқий ёрдам кўрсатиш билан бирга маҳаллалар кесимида қонун ҳужжатлари тарғиботини олиб бормоқдамиз», – дейди туман адлия бўлими бошлиғи Бахтиёр Улмасов.
Бўлим томонидан тумандаги ташкилотлардаги вакант бўлган ҳуқуқшунос лавозимини кадрлар билан таъминлаш чоралари кўрилмоқда. Хусусан, туман ҳокимлиги, сил касалликлари шифохонаси, халқ таълими бўлими ва бандликка кўмаклашиш марказида ҳуқуқшунослар иш бошлади. Шунингдек, бўлимга бандлигини таъминлашда ёрдам сўраб мурожаат этган 8 нафар фуқаро бўлим ёрдами билан ишга жойлашди. 1 нафар фуқаронинг пенсияси қайта ҳисобланди.
Маълумот учун, Ўзбекистон Республикаси Президентининг 2018 йил 13 апрелдаги «Давлат ҳуқуқий сиёсатини амалга оширишда адлия органлари ва муассасалари фаолиятини тубдан такомиллаштириш чора-тадбирлари тўғрисида»ги Фармони асосида республиканинг барча шаҳар ва туманларида адлия бўлимлари ташкил этилган.
Изоҳ (0)