Фарғона вилояти Риштон туманида «Обод қишлоқ» дастури асосида «Хуррамобод» ва «Бўстон» маҳалла фуқаролар йиғинларида кенг кўламли бунёдкорлик ишлари олиб борилиши белгиланган. Ҳозирга қадар манзилли чора-тадбирларга мувофиқ, мазкур ҳудудларда бир қатор ишлар бажарилди. Бу ҳақда ЎзА хабар бермоқда.
Хусусан, «Хуррамобод» маҳалла фуқаролар йиғинида ички йўллар таъмирдан чиқарилди, кўчалар ободонлаштирилиб, тобора чирой очмоқда, турли маиший хизмат кўрсатиш шохобчалари қад ростламоқда. Кам таъминланган оилаларга моддий ёрдам кўрсатилиб, тадбиркорларга имтиёзли кредитлар ажратилмоқда.
Афсуски, Фарғона-Қўқон автомобиль йўлида жойлашган «Бўстон» маҳалла фуқаролар йиғинида мазкур йўналишдаги ишлар суст бажарилмоқда. Сабаби, дастур ижросига мутасадди бўлган раҳбарлар бунга бефарқ муносабатда бўлмоқда.
Ҳудуддаги катта йўл бўйида жойлашган, талабга жавоб бермайдиган уй-жойлар, маиший хизмат кўрсатиш шохобчалари бузилиб, замонавий меъморчилик асосида қайта қурилиши белгиланган. Аммо масъул тижорат банклари томонидан бу ердаги тадбиркорлар ва аҳолига кредит ажратишда масъулиятсизликка йўл қўйилмоқда. «Қишлоқ қурилиш банк» ва «Ипотека банк» Фарғона филиаллари ходимлари фаолиятига аҳолида ҳақли эътирозлар бўлмоқда. Чунки, тижорат банклари вакиллари «қуруқ ваъдалар» билан юрибди.
Намунавий лойиҳа асосида уй-жойлар қуриш ва таъмирлаш, лойиҳа-сметаларини ишлаб чиқиш борасида ҳам мутасадди ташкилотлар қўл қовуштириб турганини қандай изоҳлаш мумкин? Аксарият хонадонларнинг кадастр ҳужжати йўқ. Эҳтимол, мана шулар ҳам банкларнинг кредит ажратишида тўсиқ бўлаётгандир.
Уч мингдан ортиқ аҳоли истиқомат қилаётган маҳалла фуқаролар йиғинида аҳоли асосан ҳунармандчилик ва тадбиркорлик билан шуғулланади. Эътиборли жиҳати, Риштон азалдан ҳунармандчилиги билан ҳам машҳур. Шунинг учун туманга кўплаб хорижлик сайёҳлар ташриф буюради. Албатта, бу ҳудуд янада обод бўлиб, инфратузилмаси яхшиланса, аҳолининг ҳам фаровонлиги ошади. Вақт ўтиб бормоқда, амалий ишдан эса дарак йўқ.
«Бўстон» маҳалла фуқаролар йиғини ҳудудида «Ҳазрати Хизр» зиёратгоҳи жойлашган бўлиб, бу ер доимо зиёратчилар билан гавжум. Лекин зиёратчилар учун ҳеч қандай шароит йўқ, санитария талабларига жавоб бермайди. Бу ердаги савдо-сотиқ билан шуғулланаётганларни кўриб, таажжубга тушишингиз аниқ, «қўлбола» савдо расталари, ариққа ташланган ахлат уюмлари ҳеч бир мутасаддини қизиқтирмайди.
Бугун бу ердаги аҳоли «Обод қишлоқ» дастуридан кўп нарсаларни кутмоқда. Фақат уларга зарур кўмак кўрсатиш, оғирини енгил қилиш керак, холос. «Бўстон» ўз номи билан боғ-у бўстонга, обод масканга айланиши керак.
Изоҳ (0)