Фарғонада 15 млн сўм маблағни ўзлаштирган банк ходими жавобгарликка тортилди

Фарғонада 15 000 000 сўм кредит маблағларини мақсадсиз сарфлаб, ўзлаштириш йўли билан талон-торож қилган Халқ банки филиали бошқарувчисига жазо тайинланди. Бу ҳақда «Дарё» мухбири Азизжон Эрматов хабар бермоқда.

Жиноят ишлари бўйича Бувайда туман судининг маълум қилишича, Халқ банки Бувайда туман филиалининг собиқ бошқарувчиси О.И. Марказий банк бошқаруви низомида белгиланган чекловларга амал қилмасдан, банкда ишлаб келгани ҳолда ўзи, онаси ва турмуш ўртоғининг номига кредит шартномалари расмийлаштирган. Ушбу шартномаларга асосан, кўчат сотиб олиш мақсадида уч йил муддатга тўққиз фоиз устама тўлаш шарти билан 15 000 000 сўм кредит маблағларини кенгаш розилигисиз олишга эришган. О.И. гўёки кўчат сотиб олиш мақсадида кредит маблағларини дастлаб «Қиловтепа замин саховати инвест» агрофирмасига, ундан «С–Низом Бунхон» деҳқон хўжалиги ҳисоб рақамига ўтказган.

Кейинчалик, деҳқон хўжалиги раҳбарининг хабарисиз ва унинг розилигини олмасдан бу маблағларни молиявий ёрдам тариқасида акасининг хусусий корхонасига ҳамда ўзининг шахсий пластик картасига ўтказиб, кредитни мақсадсиз сарфлаб, пул маблағларини ўзлаштириш йўли билан талон-торож қилган.

Шунингдек, «Қиловтепа замин саховати инвест» агрофирмаси раҳбари У.Ҳ. Халқ банки Бувайда туман филиали томонидан 7 нафар фуқарога ажратилган жами 35 000 000 сўм мақсадли кредит маблағларининг 27 000 000 сўмдан ортиғини ўзининг шахсий эҳтиёжлари учун сарфлаб юборгани аниқланди.

Суд ҳукми билан банк филиали бошқарувчиси О.И. ва агрофирма раҳбари У.Ҳ.га тегишли жазо тайинланди. Етказилган моддий зарарни қоплаш чоралари кўрилди.

Маълумот учун, Фарғона вилояти Бувайда туманида тижорат банклари томонидан 259 та иссиқхона қурилиши, 11 806 бош парранда ва лимон кўчатлари сотиб олиниши учун ажратилган жами 2 миллиард 171 миллион сўмлик кредит маблағлари ўз эгаларига етиб бормагани ёки бошқа асосларга кўра жойида мавжуд эмаслиги аниқланган.

Аввалроқ Фарғона вилоят прокуратураси томонидан ТИФ «Миллий банк», АТ Халқ банки ва «Агробанк»нинг туман филиаллари ҳамда тумандаги агрофирмалар мансабдор шахсларига нисбатан Жиноят Кодексининг 205-моддаси (Ҳокимият ёки мансаб ваколатини суиистеъмол қилиш), 2-қисми, «а» банди ва 167-моддаси (Ўзлаштириш ёки растрата йўли билан талон-тарож қилиш), 3-қисми, «а» банди билан жиноят ишлари қўзғатилгани, тергов ҳаракатлари якунланиб, жиноят ишлари айблов хулосаси билан бирга судга оширилгани ҳақида хабар берилган эди.