Шарқий ҳарбий округ қўшинлари қўмондонлиги ташаббуси билан Андижон вилоятида «Армия ва ёшлар» акцияси бўлиб ўтди. Марҳамат туманининг «Истиқлол» истироҳат боғида ташкиллаштирилган ушбу акцияда 10 000 нафардан ортиқ ёшлар ва маҳалла фаоллари иштирок этди. Бу ҳақда Мудофаа вазирлиги матбуот хизмати «Дарё»га маълум қилди.
Акция доирасида иштирокчиларга 50 дан ортиқ турдаги ҳарбий техника ва қурол-яроқлар, узоқликни аниқлаш ва мўлжалга олиш мосламалари, шунингдек, алоқа воситалари намойиш этилди.
Хоҳловчиларга мазкур қурилмаларни ўз қўллари билан ушлаб кўриш имконияти ҳам тақдим этилди.
Тадбирга ташриф буюрганларнинг мароқли ҳордиқ чиқаришлари учун ҳарбий оркестр тантанали концерт дастурини ижро этган бўлса, ҳарбий хизматчилар кўргазмали қўл жанги беллашувлари билан саҳнада чиқиш қилди.
Бундан ташқари меҳмонлар дала ошхонасининг фаолияти билан танишди, ҳарбийларнинг кундалик таомларидан тановвул қилиб кўрди.
Изоҳ (0)