Ўзбекистонда умумбашарий қадриятлар куйчиси сифатида эътироф этилган Чингиз Айтматов таваллудининг 90 йиллигини муносиб нишонлашга қизғин тайёргарлик кўрилмоқда. Бу ҳақда ЎзА хабар бермоқда.
Президентнинг 2018 йил 2 апрелдаги «Буюк адиб ва жамоат арбоби Чингиз Айтматов таваллудининг 90 йиллигини кенг нишонлаш тўғрисида»ги қарори ижроси доирасида кенг кўламли ишлар амалга оширилмоқда. Буюк адибнинг «Сарвиқомат дилбарим» қиссаси асосида суратга олинаётган бадиий фильм шулар жумласидандир.
«Ўзбеккино» миллий агентлиги буюртмаси асосида «Ёшлар ижодий тажриба студияси» томонидан экранлаштирилаётган мазкур фильм Тошкент ва Наманган вилоятлари, шунингдек, қисман Қирғизистон Республикаси ҳудудида тасвирга олинмоқда.
«‘Сарвиқомат дилбарим’ мен қўл урган илк жиддий ва драматик асар, — дейди истеъдодли ёш режиссёр Сарвар Каримов. — Қисса жанр нуқтаи назаридан режиссёрдан алоҳида масъулият талаб қилади. Чунки, бу асар кўп тилларга таржима қилинган, миллионлаб китобхонлар ўқиган. Демак, зиммамизда Чингиз Айтматов қаҳрамонлари яшаб келаётган мухлислар қалбида китоб ва кино орасидаги тафовутни моҳирона топиш, классик асарга ва китобхон эътиқодига зарар етказиб қўймаслик масъулияти турибди. Шунингдек, ижодий гуруҳ М.Матчонов, Б.Йўлдошев, А.Ражабов, У.Қодиров сингари тажрибали актёрлар билан бирга, асосан ёшлардан таркиб топгани ҳам масъулиятни икки ҳисса оширади».
Фильмдаги бош қаҳрамон — Асал ролига Қирғизистон академик театри актрисаси Мадина Талипбек таклиф этилган. Шунингдек Хадича ролини ҳам қирғиз актрисаси Элина Абай қизи ижро этмоқда.
Фильмнинг премьерасини 2018 йил декабрь ойида ўтказиш режалаштирилган.
Изоҳ (0)