Ўзбекистонда вино маҳсулотлари рекламаси яна телевидениега қайтиши мумкин. Бу ҳақда Давлат рақобат қўмитасининг реклама фаолиятининг назорати ва истеъмолчилар ҳуқуқларини ҳимоя қилиш бошқармаси бошлиғи Дилшод Азимов маълум қилди, дея хабар беради «Халқ сўзи».
Айни вақтда «Реклама тўғрисида»ги Қонунга ўзгартиш ва қўшимчалар киритиш тўғрисида ҳужжат лойиҳаси ишлаб чиқилган бўлиб, унда вино маҳсулотларини реклама қилишга қўйилган тақиқни юмшатиш ҳам таклиф қилинган. Таклиф айни вақтда «Ўзшаробсаноат»га тақдим этилган ва у ерда кўриб чиқилмоқда.
«ТВ орқали бу турдаги рекламани фақат кечки 23:00 дан тонгги 06:00 гача кўрсатишга рухсат бериш таклиф қилинган. Яна бир муҳим масала: бундай рекламаларда одамлар тасвири ва анимациядан фойдаланиш тақиқланади. Яъни, чиройли қизлар ёки спортчи йигитлар шароб ичиб тургани тасвирланган реклама яратиш мумкин бўлмайди», — дейди Азимов.
Ҳозирча бундай турдаги рекламаларни фақатгина ТВ орқали бериш масаласи лойиҳага киритилган. Шунингдек, интернет орқали фақат ишлаб чиқарувчиларга маҳсулотини реклама қилишга рухсат бериш масаласи ҳам кўриб чиқилмоқда.
«Биз шунингдек, стационар савдо нуқталарига рекламаларни жойлаштиришни ва ишлаб чиқарувчиларга мамлакат ичида ташкил қилинган кўргазмаларда вояга етган шахслар учун бепул маҳсулотлар намуналарини тарқатишга рухсат беришни режалаштирганмиз. Буларнинг барчаси Ўзбекистонда ишлаб чиқарилган маҳсулотлар учун қўлланилади. Ушбу шартларни маҳаллий пиво маҳсулотини реклама қилиш учун таклиф этмоқчимиз», — деди Азимов.
Айни вақтда идора бу борада Туркия тажрибасини ўрганмоқда. Чунки мазкур давлатда ҳам бу турдаги маҳсулотлар рекламаси учун қатъий тақиқлар жорий қилинган. Шунингдек икки мамлакат менталитети ўхшашлиги ҳам бунга асос бўлади.
Маълумот учун, Ўзбекистонда алкоголь маҳсулотлари рекламаси 2010 йилдан бошлаб бутунлай тақиқланганди.
Изоҳ (0)