Сергели туманини ижтимоий-иқтисодий ривожлантириш мақсадида 2018 — 2021 йилларда 80 га яқин йирик инвестициявий лойиҳани амалга ошириш режалаштирилган. Бу ҳақда журналистлар иштирокида ўтказилган матбуот анжуманида туман ҳокимлиги мутасаддилари маълум қилди, дея хабар беради «Халқ сўзи».
Ушбу мақсадлар учун 4 триллион сўмдан ортиқ маблағ, 362 миллион АҚШ долларидан ортиқ чет эл сармояси жалб қилинади.
Тадбирда маълум қилинишича, туманда 10 мингдан зиёд янги иш ўрни яратилиши режалаштирилган.
Айни пайтда ҳудудда истиқболли лойиҳалар ҳам амалга оширилмоқда. Жумладан, шу йилнинг учинчи чорагида тайёр тўқимачилик маҳсулотларини ишлаб чиқаришни кенгайтириш мақсадида Laura Peri Fashion корхонаси фаолияти йўлга қўйилади. Лойиҳанинг умумий қиймати 33 миллиард сўмни ташкил қилади.
Шунингдек, туманда келгуси йилда юқори технологияли замонавий ускуналар ёрдамида қандолат маҳсулотларини ишлаб чиқаришни ташкил этиш мақсадида Orient Confeсtion, шу йилда қурилиш михлари, темир симлар ва пайвандлаш электродлар ишлаб чиқариш бўйича Central Asiya корхоналарини очиш мўлжалланган.
Қолаверса, замонавий беш юлдузли меҳмонхона, Бизнес маркази, кўп тармоқли тиббиёт маркази, кўнгилочар истироҳат боғи ҳамда хизмат кўрсатиш шохобчалари, кўп қаватли уйлар қуриш ҳам кўзда тутилган.
Изоҳ (0)