Тошкент шаҳар ички ишлар бош бошқармаси ва Тошкент шаҳар прокуратураси ҳамкорлигида олиб борилаётган чора-тадбирлар натижасида Салор канали бўйида кенг кўламли ободонлаштириш ишлари бошлаб юборилди. Бу ҳақда ИИББ матбуот хизмати маълум қилди.
Узунлиги 65 километрни ташкил этувчи Салор каналининг 1,5 километри Миробод туманидан оқиб ўтади. Жумладан, Байналминал маҳалласининг шу канал бўйидаги ҳудудида кўплаб хонадонлар, турли ташкилотлар жойлашган.
Йиллар давомида қаровсиз қолган канал суви чиқиндилар ва сув ўтлари билан қоплангани етмагандек, хонадонлардан чиқадиган канализация чиқиндилари ҳам бу ерга оқизиб келинган.
Сув бўйида 100 га яқин хонадон жойлашган бўлиб, уларнинг кўпчилиги ноқонуний равишда қирғоқдаги ерларни ўз ҳовлисига қўшиб олган. Оқибатда канал бўйида ҳаракатланиш учун йўл қолмаган. Аслида эса каналнинг икки томонидан камида 6 метрдан бўш жой бўлиши лозим.
Жалб қилинган техникалар ёрдамида бу ердан катта миқдордаги чиқиндилар олиб чиқиб кетилди. Канал бўйидаги ноқонуний қурилмалар бузиб ташланди, қаровсиз дарахтларга шакл берилиб, канал суви ахлатлардан тозаланди.
Изоҳ (0)