«Ўзбекконцерт» раҳбари «бирров»ини 2 минг доллар қилган хонандани кескин танқид қилди (видео)

«Ўзбекконцерт» давлат муассасасида «Миллий эстрада санъатининг ёшлар маънавий, ахлоқий тарбиясидаги ўрни ва санъаткор одоби» мавзусида йиғилиш бўлиб ўтди.

Йиғилишда муассаса раҳбарияти, санъаткорлар, ОАВ ходимлари қатори «Дарё» мухбири Феруз Муҳаммад ҳам иштирок этди.

Йиғилишда «Ўзбекконцерт» давлат муассасаси раҳбари тўйга чиқиш нарх-наволари ҳақида алоҳида тўхталиб ўтиб, «бирров» хизмат қилиш учун икки минг доллар нарх белгилаб олган хонандани кескин танқид қилди.

Нарх-наво масаласида жуда ҳам кўп эътирозлар келиб тушмоқда. Биз тушунамиз, биз телевидениедаги нархни тушуришга ҳаракат қилмоқдамиз. Илтимос, яна бир марта айтаман, илтимос, сизлар ҳам сал бўлса-да халқни инобатга олинглар. Агар санъатдан кетадиган бўлсанг кет, нима қиласан нархингни кўтариб. Икки йил, бир йил олдин ўша пулга Самарқандга тўйга боргансан, ҳозир эса Тошкентга «бирров»га чиқмоқчисан. Бу гап бошқаларга ҳам тегишли, нима қиласизлар бундай қилиб, айнан ўша хонанда бўйича бизга шикоят қилишмоқда. Мухлислар уни санъатдан кетиши учун нархини икки минг доллар қилиб қўйганини билмайди, халқ уни хоҳлаяпти ва икки минг доллар экан деб бизга ёзишмоқда. Албатта икки минг долларни кимнинг шароити кўтаради, у ким эди, халқ артистимиди у, биргина у эмас бошқалар ҳам нарх сиёсатига хушёр бўлинглар. Шароитдан келиб чиққан ҳолда иш туцангиз яхши бўлади. Ҳозир «нархим тушса рейтинггим тушар экан» дейдиган замон эмас. Сиз нархингизни тушурмасангиз, сизга ўхшаган қўшиқчи юз мингта. Халқни рози қилинглар, ҳаммамиз шу халқнинг орқасидан юрибмиз-ку.

Одилжон Абдуқаҳҳоров, «Ўзбекконцерт» давлат муассасаси директори