Тошкент шаҳрининг Яшнобод туманида 119-йўналиш бўйлаб ҳаракатланувчи Isuzu йўловчи автобуси Толариқ ариғига қулаган эди. Автобус иштирокида ушбу йўл-транспорт ҳодисаси юз берган вақтда унинг салонида, ҳайдовчидан ташқари, 20 нафар йўловчи бўлган. Ҳодиса оқибатида фақат ҳайдовчи жароҳат олган.
Дастлаб тарқатилган хабарларда соатига 27 километр тезлик билан ҳаракатланиб кетаётган автобуснинг йўлига кутилмаган фил суяги рангли Nexia чиқиб келгани, оқибатда автобус ҳайдовчиси бошқарувни йўқотиб, ариққа қулагани айтилганди. Ҳатто шаҳар Йўл ҳаракати хавфсизлиги бошқармаси (ЙҲХБ) ЙТҲга сабабчи Nexia’ни излаётгани маълум қилинган эди.
Тошкент шаҳар ИИББ томонидан 17 май, пайшанба куни ўтказилган брифингда ушбу ЙТҲ билан боғлиқ вазиятга тўхталиб ўтилди. Бош бошқарма ахборот мультимедиа маркази вакилларининг шаҳар ЙҲХБга асосланиб маълум қилишларича, «ЙТҲга Nexia русумли машина сабаб бўлгани ҳақида маълумот йўқ».
Таъкидлашларича, ҳозирги вақтда ушбу авария юзасидан дастлабки тергов-суриштирув ишлари олиб борилмоқда.
Қайд этишларича, айнан шу йўл-транспорт ҳодисасидан сўнг «Тошшаҳартрансхизмат» компанияси ўзи тасарруф этадиган автобусларни босқичма-босқич видеорегистраторлар билан таъминлаш ҳақида қарор қабул қилган.
Изоҳ (0)