Жаҳон ҳамжамияти Ўзбекистоннинг мажбурий меҳнатга чек қўйиш йўлидаги саъй-ҳаракатларини эътироф этди

Женевада БМТ Инсон ҳуқуқлари кенгашининг УДШ бўйича ишчи гуруҳнинг 30-сессиясида Ўзбекистон маърузаси тингланди, деб хабар беради ЎзА.

Адлия вазирлигининг маълум қилишича, йиғилиш доирасида 78 мамлакат вакили сўзга чиқиб, 200 дан ортиқ тавсия киритди. Аксарият мамлакатлар делегациялари Ўзбекистоннинг инсон ҳуқуқларини таъминлаш борасидаги саъй-ҳаракатлари ва ютуқлари, амалга оширилаётган конституциявий, институционал ва маъмурий ислоҳотлар, Ўзбекистоннинг халқаро ҳамжамиятга интеграциясини ошириш ва конструктив мулоқотга самимий очиқлигини юксак баҳолади. Австралия, Жазоир, Арманистон, Болгария, Буюк Британия, Венгрия, Германия, Литва, Малайзия, Финляндия, Франция шулар сирасидандир.

Шунингдек, Болгария, Грузия, Греция, Эрон, Италия, Қозоғистон, Ирландия, Эстония каби давлат вакиллари Ўзбекистоннинг БМТ ҳуқуқни ҳимоя қилиш тузилмалари билан ҳамкорлигини ривожлантириш ва кенгайтириш бўйича саъй-ҳаракатларини қўллаб-қувватлади. БМТ Олий комиссарининг Ўзбекистонга илк тарихий ташрифи ва узоқ танаффусдан сўнг дин ва эътиқод эркинлиги бўйича махсус маърузачининг ташрифи, уларнинг якунлари бўйича эришилган келишувлар ижроси бўйича «йўл хариталари»нинг қабул қилиниши бунга ёрқин мисолдир

Аъзо мамлакатлар, шунингдек, Ўзбекистоннинг, айниқса, пахта теришда болалар меҳнатига барҳам бериш (Канада, Литва, Нидерландия, Норвегия, Тожикистон), мажбурий меҳнатга чек қўйиш бўйича аниқ қадамлар (Канада, Франция, Германия, Нидерландия, Тожикистон), тегишли соҳаларда Халқаро меҳнат ташкилоти билан яқин ҳамкорлик (Канада, Марокаш) масалаларидаги ютуқларига ижобий баҳо берди.

Европа Иттифоқи ва Лотин Америкасининг қатор мамлакатлари (Бельгия, Аргентина, Венгрия, Литва, Мексика, Норвегия, Ирландия, Швеция, Швейцария) сиёсий, ҳуқуқни ҳимоя қилиш ёки журналистика фаолияти учун қамоққа олинган шахсларнинг озод этилишини қўллаб-қувватлади.

Сўз ва ОАВ эркинлиги (Россия, Бельгия, Аргентина, Болгария, Венгрия, Италия, Словакия), фуқаролик жамияти институтларини рўйхатга олиш тизимини соддалаштириш (АҚШ, Уругвай, Арманистон), инсон ҳуқуқлари бўйича узлуксиз таълим тизимини шакллантириш (Куба, Арманистон), коррупцияга қарши кураш (Миср), қийноқларга қарши кураш (Финляндия, Буюк Британия), одам савдоси ва уларнинг қурбонларини реабилитация қилиш (Миср, Исландия, Эрон, Покистон, Филиппин, Тожикистон, Жазоир) бўйича қабул қилинаётган чора-тадбирлар самарали деб эътироф этилди.