Каттақўрғон туманидаги 42-сонли мактабнинг меҳнат тўгараги ўқитувчиси Диана Еникееванинг вафоти Maxсус текшириш комиссияси хулосасига биноан, ишлаб чиқаришдаги бахтсиз ҳодиса деб топилди ва тегишли тартибда Н-1 шаклидаги далолатнома тузилди. Бу ҳақда «Kun.uz» нашри хабар берди.

Агар ўлим ишлаб чиқариш билан боғлиқ дея эътироф этилса, унда меҳнат қонунчилигига кўра, вафот этган ходимнинг яқинларига бир қатор тўловлар тўлаб берилиши керак.

Олинган маълумотларга кўра, «Агросуғурта» суғурта компаниясининг Каттақўрғон туман бўлими томонидан марҳум Диана Еникееванинг оиласига бир марта тўланадиган 44 миллион 697 минг 96 сўм бир йўла нафақа миқдори белгиланган. Бунда Диананинг олти йиллик ўртача иш ҳақи ҳисобга олинган.

Шунингдек, боқувчисини йўқотганлик туфайли Диананинг фарзандига ойма-ой 206 минг 931 сўм миқдорида нафақа тўлаш белгиланди. Ушбу нафақа фарзанди токи 16 ёшга тўлгунга қадар, яъни 2018 йил март ойидан 2032 йил 4 февралга қадар тўлаб борилади.

Бундан ташқари, 2019 йил 4 февралга қадар, яъни Диананинг фарзанди уч ёшга тўлгунга қадар жами 2 миллион 211 минг 634 сўмлик тўлов ҳам тайинланган.