Тошкент шаҳар божхона бошқармаси ходимлари сифати кафолатланмаган дори-дармон ҳамда озиқ-овқат маҳсулотларини Ўзбекистонга ноқонуний олиб кирилишига чек қўйди, деб хабар беради Божхона қўмитаси ахборот хизмати.
Жумладан, «Келес» темир йўл чегара божхона постида «Москва — Тошкент» йўловчи поездида кириб келган фуқаро Ж. Усмоновнинг (мақоладаги барча исм-шарифлар ўзгартирилган) қўл юклари божхона назоратидан ўтказилганда, унда йўловчи божхона декларациясида кўрсатилмаган ҳамда божхона ходимининг оғзаки сўровида маълум қилмаган 735 дона турли дори воситалари борлиги аниқланди. Хорижда ишлаб чиқарилган 21 турдаги мазкур дори-дармонларнинг умумий қиймати 24 миллион сўмдан ошар экан.
Шунингдек, мазкур пост ходимлари худди шу йўналишда кириб келган йўловчи поезднинг яна бир йўловчиси Ф. Қосимовнинг қинғир қилмишларига чек қўйди. Божхона назоратидан ўтиш вақтида ушбу шахс қиймати 23 миллион 400 минг сўмлик 4680 дона сақичларни яширинча олиб ўтишга урингани фош бўлди.
Ҳозирда мазкур ҳолатлар юзасидан божхона текширувлари ва суриштирув ҳаракатлари давом эттирилмоқда.
Изоҳ (0)