«Sreda.uz» Тошкент марказидаги кўп йиллик улкан дарахтлар кесиб ташланаётгани тасвирланган суратларни тўплаб тақдим этди.
«Чинорлар, эманлар, шумтолларни олдинлар ҳам кесишган, бугун ҳам кесишмоқда, эртага эса Тошкентда кесишади, ундан кейин Ўзбекистоннинг бошқа шаҳарларида. Дарахтлар бизники, халқники. Улар туман ёки шаҳар ҳокимига тегишли эмас», — дейилади хабарда.
«Ҳокимларнинг оғзаки буйруқларига қараб иш тутилмоқда. 3 май куни Ўрдада ҳам худди шу каби ҳолатга гувоҳ бўлдим. Ҳудуд инспекцияси ходимлари келишганида, дарахтни кесаётганларнинг ‘каттаси’ ‘ҳужжат йўқ бўлса нима қилибди? Бу чинорлар чириб кетган’,— дея жавоб қайтарди. Рухсатнома билан кесилганида, чинорларга энг юқори нархда пул тўлашади. Чунки у жуда қадрли ва мустаҳкам дарахт», — дейди пост муаллифи. Шунингдек, Facebook ижтимоий тармоғида 2 май куни Бош прокуратура яқинидаги дарахтларнинг кесилаётгани тасвирланган сурат келтириб ўтилган.
Таъкидланишича, ушбу куннинг ўзида Тошкент марказида — эски Консерватория олдидаги дарахтлар ҳам кесилган. Милиция ходимлари эса содир бўлаётган ҳодисани четда туриб, шунчаки кузатишган.
Изоҳ (0)