Наманган вилояти Учқўрғон туманидаги «Намуна» маҳалла фуқаролар йиғинида яшовчи Ситора Ғофуржонова туғилганлик ҳақидаги гувоҳномасини энди олди, деб хабар беради ЎзА.
Мутасадди ташкилотларнинг бефарқлиги туфайли Ситора шу пайтга қадар туғилганлик ҳақидаги гувоҳномасини ололмаган. У ҳамма қатори аввал боғчага, кейин мактабга қатнаган. Бироқ, ушбу муассасаларда ундан ҳужжат сўралмаган.
Фақат Ситора Ғофуржонова ҳужжатсиз ишга кира олмагани учун бу масалани ҳал қилишга унинг ўзи киришган. Бу борада у туман фуқаролик ҳолати далолатномаларини ёзиш (ФҲДЁ) бўлимига мурожаат қилган. Бу ерда мурожаати рад этилгач у Учқўрғон тумани маъмурий судига шикоят аризаси йўллаган.
Маълум бўлишича, Ситора ота-онаси ажрашиб кетгач дунёга келган. ФҲДЁ бўлими унинг аризасини туғилганлик ҳақидаги гувоҳномани бериш учун етарли ҳужжатлари мавжуд эмаслиги сабабли рад этган.
«Суд жараёнида тарафлар ва гувоҳларнинг кўрсатмалари эшитилди ҳамда ишга қўшилган ҳужжатларни атрофлича муҳокама қилинди. Аниқлаган ҳолатларга кўра, ФҲДЁ бўлими Ситора Ғофуржонованинг важларини тўлиқ ўрганмаган. У тақдим қилган ҳужжатлар орасида Фарғона вилояти Қўқон шаҳар туғруқ мажмуаси томонидан Ситоранинг онаси Ш.Ғофуржонова номига берилган маълумотнома мавжуд бўлган. Унда аёлнинг 1997 йил 22 ноябрда қиз фарзанд туққани баён этилган. Ушбу тиббий маълумотнома ФҲДЁ томонидан асоссиз равишда инобатга олмаган», —дейди Олий суд матбуот хизмати раҳбари Азиз Обидов.
Ушбу сабабларга асосан суд Ситора Ғофуржонованинг шикоят аризасини қаноатлантирди. ФҲДЁ бўлими зиммасига Ситорага туғилганлик ҳақида гувоҳнома ёзиб бериш мажбурияти юкланди. Бу ҳужжатни олгач у паспорт олиши мумкин бўлади.
Изоҳ (0)