Қашқадарё вилояти Китоб тумани тиббиёт бирлашмаси тасарруфидаги кардиология ва эндокринология бўлимлари янги бинода иш бошлади, деб хабар беради ЎзА.
«Шўртангазкимё» мажмуаси ҳомийлигида 1 миллиард 700 миллион сўм маблағ эвазига барпо этилган янги бинода шифокор ва беморлар учун барча шароит яратилган. Лаборатория ва физиотерапия хоналари замонавий жиҳозланган.
Юрак фаолиятининг бузилиши билан боғлиқ касалликлар даволанаётган кардиология бўлимида 40 нафар малакали тиббиёт ходими беморларга тиббий хизмат кўрсатмоқда. Бу ерда жорий йилнинг ўтган даврида 616 нафар бемор даволанган.
Бинонинг иккинчи қавати эндокринология бўлимига ажратилган бўлиб, 30 ўринга мўлжалланган. Бу ерда 42 нафар тиббиёт ходими аҳоли саломатлигини мустаҳкамлаш йўлида меҳнат қилмоқда. Бўлимда қандли диабет, тери-таносил, буқоқ каби хасталиклар билан оғриган беморлар даволанмоқда. Бўлимда жорий йилнинг ўтган даврида 350 нафар беморга ихтисослаштирилган тиббий хизмат кўрсатилган.
Ихтисослаштирилган тиббий хизматга тайёр бу бўлимлар фаолияти йўлга қўйилиши ҳудуд аҳолисининг саломатлигини мустаҳкамлашда муҳим аҳамият касб этади. Шифокорлар пойтахтда ва чет элларда малака ошириб қайтди. Бўлимлар қошида юқори технологияли жиҳозлар билан таъминланган замонавий лаборатория хизматлари ҳам йўлга қўйилган. Эндокринология ва кардиология хизматини жаҳон стандатлари асосида кўрсатиш учун ҳамма шароит мавжуд. Муҳими, узоқ тоғли ҳудудлар, масалан, Китоб туманидаги Обиканда, Деновбола каби чекка қишлоқлар аҳолисига ихтисослаштирилган тиббий хизмат яқинлаштирилди. Энди бу ҳудуд аҳолиси Тошкент ёки Самарқандга бориб юрмайди, шу ернинг ўзида даволаниши мумкин. Мазкур бўлим нафақат касалликларни даволаш, балки унинг олдини олиш, яъни аҳоли ўртасида соғлом турмуш тарзини тарғиб қилишда ҳудуддаги шифокорлар, патронаж ҳамшираларининг малакасини ошириш, улар билан маҳорат дарсларини ўтказишга ҳам хизмат қилади.Динара Алиева, Қашқадарё вилояти эндокринология диспансери бош шифокори
Изоҳ (0)