Фото: Volkswagen’нинг минглаб ташландиқ дизель машиналари жойлашган автотураргоҳи

Volkswagen компанияси жорий йилнинг февраль ойида америкалик харидорлардан 350 минг нусхадан ортиқ дизель автомобилларини 7,4 миллиард долларга сотиб олди. Ишлаб чиқарувчи томонидан сотиб олинган барча машиналар Америкадаги 37 та майдонда сақланмоқда. Reuters агентлиги шу каби автотураргоҳлардан бирининг суратларини тақдим этди, деб хабар беради «Мотор».

Volkswagen дизель можароси сабаб қайтадан сотиб олишга мажбур бўлган автомобилларини турли майдонларда сақлаб келмоқда: масалан, Детройтдаги футбол стадионида, Миннесотадаги собиқ қоғоз фабрикасида, Понтиак шаҳридаги ташландиқ стадион яқинида ва ҳатто Калифорния чўлида ҳам.

Барча майдонларда автомобиллар вақтинча сақланмоқда ва компания уларни иккиламчи бозорда сотишни ёки экспорт қилишни режалаштирган.

Масалан, ўтган йил якунларига кўра VW компанияси 335 минг нусхада дизель машиналарини чиқарган бўлса, уларнинг 13 мингтасини қайтадан сотган ва 28 мингтасини утилизация қилган. 2017 йил охирида АҚШ ҳудудидаги майдонларда жами 294 минг автомобиль сақланган.

Икки йил олдин VW АҚШ ҳукумати билан келишиб, дизель машиналарига эгасига иккита танловни таклиф этганди: машинани компанияга сотиш ёки бепул таъмирлатиш. Иккала ҳолатда ҳам уларда қўшимча компенсация тўланади.

Volkswagen экологик тестлардан ўтишда фирибгарлик схемасидан фойдалангани 2015 йилнинг сентябрида маълум бўлганди. Бутун дунё бўйлаб бу каби муаммо 11 миллион машинада кузатилган. Маълумотларни яширган компанияга нисбатан 90 миллиард долларгача жарима солиниши мумкин.