Пойтахт стадионларига мухлислар қайтмоқда: «Бунёдкор» ва «Пахтакор» Суперлиганинг 4-турида энг кўп томошабин тўплади
Футбол бўйича Ўзбекистон Суперлигасининг 4-турида мухлисларни жалб этиш бўйича пойтахт стадионлари етакчи бўлди. Бу ҳақда ПФЛ хабар берди.
«Пахтакор» ва Фарғонаганинг «Нефтчи» жамоалари ўртасидаги учрашувга 15 100 нафар томошабин ташриф буюрди. Бироқ бу сон ҳам «пахтакорчи»ларнинг бу мухлис тўплаш борасида етакчи бўлишига бироз камлик қилди. Сабаби, «Бунёдкор» ва «Бухоро» жамоалари ўртасидаги ўйинни 15 421 нафар ишқибоз бевосита стадионнинг ўзида томоша қилганди.
Пойтахт стадионлари учун бу каби кўрсаткич анчадан буён қайд этилмаётган эди. 4-турда стадионларга жами 74 909 нафар томошабин ташриф буюрди.
Аммо бу 3-турдаги мухлислар ташрифига нисбатан камдир. Ҳозирча Ўзбекистон Суперлигасининг 3-тури мухлислар ташрифи борасида энг яхшиси бўлиб турибди. Ўтган турни жами 85 209 нафар мухлис кузатиб борган.
Мавсумдаги илк турни кўриш учун стадионларга 80 570 ишқибоз ташриф буюрганди. Бунда энг кўп ишқибоз «Нефтчи» — «Насаф» ўйинига келди — 19 632.
2-турда эса ташрифлар сони камайган — 57 876. Бироқ 1 та ўйин борасидаги кўрсаткич яхшиланди ҳамда «Бунёдкор» ва «Пахтакор» клублари ўртасидаги Тошкент дербисини 20 168 мухлис стадиондан кузатди. Бу кўрсаткич мазкур икки клубнинг ўзаро ўйинлардаги рекорд натижаси бўлди. Бунгача 2008 йилги мавсумдаги Тошкент дербисини 18 мингдан кўпроқ ишқибоз кузатиб борганди.
3-турга келиб Суперлиганинг рекорди Наманганда янгиланди. «Навбаҳор» ҳамда «Локомотив» жамоалари иштирокидаги ўйинни 25 300 ишқибоз стадиондан кузатди. Шу куни айрим секторларга чипталар 30 мингдан сотилган бўлса-да, стадион кассаларида бирорта ҳам чипта қолмади. Шунингдек, Намангандаги стадионга кириш истагида бўлган яна минглаб мухлислар трибуналардан жой топа олмай, «Навбаҳор»ни майдон ташқарисида қўллаб турди.
