Наманган шаҳридаги «Мегаполис» ва «Шодлик» савдо марказларида «Ёнғин билан боғлиқ фавқулодда вазиятлар содир бўлганда аҳолини тўғри ҳаракат қилишга ўргатиш» мавзусида махсус-тактик ўқув машқлари ўтказилди. Бу ҳақда «Дарё» мухбири Азизбек Абдувалиев хабар бермоқда.
Машқлар вилоят фавқулодда вазиятлар, ички ишлар, ёнғин хавфсизлиги, соғлиқни сақлаш бошқармалари, электр, газ, сув таъминоти хизматлари ва санитария-эпидемиология назорати маркази ҳамкорлигида ўтказилди.
Машғулотлар давомида шартли равишда мажмуада ёнғин келиб чиққанидан сўнг харидорлар ва мажмуа ходимларини эвакуация қилиш, ёнғинни ўчириш ҳамда жабрланганларга биринчи тиббий ёрдам кўрсатиш бўйича амалий ҳаракатлар амалга оширилди.
Ўтказилган махсус-тактик ўқув машқларида фуқаролар ва савдо марказлари ходимларини эвакуация қилиш, доимий тайёргарликдаги хизматларга тезкор хабар бериш схемалари ишлаб чиқилди.
Савдо марказларининг барча қаватларидаги ҳамда асосий ташқарига чиқиш-қутқариш йўллари кўрсаткичлар билан жиҳозланди. Биринчи тиббий ёрдам кўрсатиш учун дори-дармон қутилари тўлиқ ҳолга келтирилди. Савдо марказлари раҳбарлари ва масъул шахсларига қўшимча йўриқнома ва кўрсатмалар берилди.
Машқларга турли хизматларнинг 100 дан ортиқ ходими, 10 дан ошиқ махсус техника жалб этилди. «Мегаполис»дан 544, «Шодлик»дан 327 нафар фуқаро шартли равишда эвакуация қилинди.
Изоҳ (0)