Наманган вилоятида Поп тумани «Янгиер» маҳалла фуқаролар йиғинида яшовчи, 1949 йилда туғилган, пенсионер Ширмоной Мирзааҳмедова Фуқаролик ишлари бўйича Чуст туманлараро судига мурожаат қилиб, узоқ йиллардан буён яшаб келган уй-жойига киритиб қўйиш тўғрисида даъво аризаси киритган, деб хабар беради ЎзА.
23 март куни Поп туманидаги маҳаллаларда ва оилаларда ижтимоий-маънавий муҳитни ўрганиш ҳамда аниқланган муаммоларни бартараф этишга кўмаклашиш бўйича ташкил этилган республика ишчи гуруҳи иштирокида «Янгиер» МФЙдаги 52-мактабда сайёр суд мажлиси очиқ тартибда, судья Иқбол Кўчкинова томонидан ўтказилди. Унда кенг жамоатчилик вакиллари ҳам иштирок этди.
Ширмоной ая 1980 йил 10 апрелда Рустамжон Курчиев билан шаръий никоҳдан ўтади. 5 нафар фарзандли Рустамжон аканинг биринчи хотини вафот этгани сабабли, унга иккинчи хотин сифатида турмушга чиқади. Улар орасида фарзанд дунёга келмайди ва оила бошлиғи 2006 йил 30 майда оламдан ўтади.
«Мен турмушга чиққанимда бу болалар жужуқ эди. Оқ ювиб, оқ тараб, муштдайлигидан вояга етказдик, уйли-жойли қилдик. 1984 йилда ер участкасини олиб, уч йилдан кейин уни қуриб-битказиб, уйга кўчиб кирдик. Йиллар давомида уйга қўшимча хоналар, омборхоналар қурдик. Аммо бугунги кунга келиб, ўгай қизим Турдиниса Қурчиева, унинг қизи Башорат Қурчиева мени ўз уйимга сиғдирмасдан кўчага ҳайдашди. Мен Турдинисанинг биринчи никоҳидан бўлган қизи Башоратни у кейинчалик бошқа никоҳ қургач, ўзим катта қилиб олдим. Олтинчи бор никоҳдан ажраб келгач, бу уйга мени сиғдирмай қўйди. 4—5 ойдан буён Кўрнос қишлоғидаги укамни уйида яшаб юрибман», — дейди даъвогар Ширмоной Мирзааҳмедова.
Судья Иқбол Кўчкинова тарафлар тушунтиришларини атрофлича тинглаб, иш ҳужжатларини атрофлича таҳлил қилиб, ҳал қилув қарорини чиқарди. Даъвогар уй-жойдан ва бинодан фойдаланиш ҳуқуқига эгалиги сабабли яшаб турган уйига мажбурий тартибда киритишга қарор қилинди. Бу қарор бўйича аппеляция ва кассация тартибида мурожаат қилиш мумкинлиги айтиб ўтилди. Мол-мулкка эгалик ҳуқуқи бўйича эса алоҳида тартибда судга мурожаат этиш мумкинлиги тушунтирилди.
Изоҳ (0)