Корея Республикаси Миллий мажлиси иш ҳафтасини 68 соатдан 52 соатгача қисқартириш ҳақидаги қонунни қабул қилди, деб ёзади «Интерфакс».
Қонун июль ойида кучга киради, бунда йирик компаниялар иш соатларини кичикларидан эртароқ қисқартириши керак. Бўш вақтнинг кўпайиши Корея фуқароларининг ҳаёт сифатини яхшилаши ҳамда мамлакатда меҳнат унумдорлиги ва бандликни ошириши тахмин қилинмоқда. Бундан ташқари, қонун тарафдорлари туғилиш даражаси ошишини кутмоқда, ушбу кўрсаткич ўтган йили аксилрекорд ўрнатган эди.
Ташаббусни янги президент Мун Чжэ Ин таклиф қилганди. Йил бошида у энг кам иш ҳақининг 16 фоизга оширилишини қўллаб-қувватлаган эди.
Янги қоидаларга кўра, Жанубий Кореяда иш ҳафтаси 40 соатлик асосий вақт ва 12 соатлик хизмат вақтидан ташқари вақтдан иборат бўлади. Корея иқтисодий тадқиқот институти ҳисоб-китобларига кўра, ислоҳот ишлаб чиқариш ҳажмлари сақланиб қолган тақдирда, иш берувчиларга йилига тахминан 11 миллиард долларга тушади.
Изоҳ (0)