Жорий йилда Навоий вилоятида ўтказиладиган Алишер Навоий ижодига бағишланган халқаро конференцияда Ўзбекистон ва 20 дан ортиқ хорижий давлатлардан 200 нафарга яқин навоийшунос олимлар иштирок этади. Бу ҳақда «Халқ сўзи» хабар бермоқда.
«Улар орасида эронлик Иброҳим Худоёр, туркиялик Фикрет Туркмен, россиялик Алексей Пилев, озарбайжонлик Мохсун Нагисойлу, Гюлбаниз Аббасова, тожикистонлик Абдусалом Абдуқодиров, қозоғистонлик Азамат Акбаров каби таниқли мутахассислар борлиги Алишер Навоийнинг бой ва серқирра ижоди фақат ўзбек, балки жаҳон адабиётида ҳам тадқиқотчилар диққат марказида эканлигидан далолатдир», — дейилади хабарда.
Бугун ҳазрат Навоий ҳақли равишда жаҳон маданиятининг мумтоз вакиллари сафидан етакчи ўринни забт этди. Унинг асарлари жаҳондаги юзлаб тилларга таржима қилинган. Шунингдек, ҳар йили дунёнинг ўнлаб нуфузли илм даргоҳларида унинг адабий мероси билан боғлиқ анжуманлар, конференциялар ўтказилмоқда. Шеърият ихлосмандлари шоир асарларида тараннум этилган олийжаноб ғоялар ва фалсафий мушоҳадаларидан завқ олмоқда.Улуғбек Сатторов, адабиётшунос олим
Изоҳ (0)