АҚШ сенатининг Россиянинг Америка президенти сайловларига эҳтимолий аралашувини текширувчи махсус қўмитаси АҚШ молия вазирлигидан миллиардер Алишер Усмонов, «Мегафон» раҳбари Иван Таврин ва Россиянинг «Ренессанс капитал» банки раҳбари Боб Форесман ҳақида ахборот сўради, деб ёзади «Snob.ru» BuzzFeed’га таяниб.
Текширувчилар 2016 йилда Россиядан Америкадаги ҳисобварақларга «сайловлар учун» белгиси остида келиб тушган 60 га яқин тўловларни аниқлаштирмоқда. Россия ҳукумати изоҳ беришича, ушбу пуллар чет элда яшайдиган россияликлар учун овоз бериш жараёнини ташкил этиш учун мўлжалланган: 2016 йил кузида Россияда парламент сайловлари бўлиб ўтган эди.
АҚШ сенати қўмитаси молия вазирлигидан 45 кишининг ҳисоблари бўйича маблағлар ҳаракатлари ҳақида маълумот сўради, улар орасида Россиянинг АҚШдаги сайловларга аралашувини текшириш доирасида ҳеч қачон тилга олинмаган уч киши бор.
Америка молия вазирлиги Таврин ва Форесманнинг хатти-ҳаракатларида ҳеч қанақа шубҳали нарсани аниқламади. Усмоновни текшириш натижалари ҳақида ҳозирча ҳеч нарса маълум эмас.
Изоҳ (0)