Сурхондарё вилоятининг Бойсун туманидаги Омонхона булоғи шифобахшлиги билан аллақачон машҳур бўлиб улгурган. Бу сувнинг ўт пуфаги, жигар ва бошқа ички органларни ювиб, дарддан фориғ этишда замонавий тиббиётда қўлланиладиган гемодездан бир неча баробар афзаллиги аниқланган, дея хабар беради ЎзА.
Мутахассисларнинг фикрича, тоғ бағридан сизиб чиқаётган булоқ суви таркибида кремний кислотаси, темир, алюмин каби инсон организми учун кўплаб фойдали элементлар мавжуд.
Сўлим гўшадаги обиҳаётдан самарали фойдаланиш мақсадида «Ўзбекистон темир йўллари» акциядорлик жамияти бу ерда замонавий шифохона барпо этди. Ҳар йили сўлим масканда минглаб одам саломатлигини тикламоқда.
Одамларга шифо улашаётган тоғ бағрида табиатнинг яна бир тилсими — ғаройиб ғор ҳам бор. Булоқдан унча узоқ бўлмаган баландликда жойлашган ушбу ғорни маҳаллий аҳоли «Омонхона совутгичи», деб атайди. Ғор туйнугидан одам танаси бироз сиқилиб ўтади.
Уч метрча чуқурликдаги ғор ичкариси кенг, худди хонани эслатади. Шу ерлик одамларнинг айтишича, ер қисми майда тоғ тошларидан иборат бу хона ёз чилласида 5-6, қишда 20 даражагача илиқ бўлади. Шу боис, кўп асрлардан буён теварак-атроф одамлари сариёғни шу ғорда сақлашга одатланган.
Мабодо, ёз чилласида салқин ва баҳаво ғорга тушилса, кўнгил суст кетиб, маҳаллий аҳоли томонидан қўйилган сариёғдан бир чимдим бўлса-да, олиб чиқишга уринмаслик керак. Акс ҳолда, ғор туйнуги кутилмаганда торайиб, ташқарига чиқишга йўл қўймаслиги эҳтимолдан холи эмас. Ҳар қалай, омонхоналиклар ўтмишдан қолган бу ривоятга ҳозир ҳам қатъий амал қилиб келади.
Изоҳ (0)