Нукуслик тадбиркор-ихтирочи Рашид Қартбаев яна бир янгиликка қўл урди: у кузда тўкилган дарахт баргларидан экологик уй барпо этмоқчи. Бу ҳақда Есимқан Қанаатов (ЎзА) маълум қилди.
«Атроф-муҳитнинг экологик ҳолатига салбий таъсир кўрсатувчи омиллардан бири кузда дарахтлардан тўкилган барглар ҳисобланади. Кўпчилик уларни ёқиб юборади ёки улар ободонлаштириш хизмати томонидан шаҳар ташқарисига чиқариб ташланади. Иккала ҳолатда ҳам табиатга жиддий зарар етиши ҳаммага маълум. Мен уларни йиғиб, баъзи аралашмаларни қўшиб, уй қуришда фойдаланиладиган блокларни ишлаб чиқара бошладим. Бундай уйлар сомондан ишланадиган экологик уйлар каби ёзда салқин, қишда эса илиқ бўлади», — дейди Рашид Қартбаев.
Тадбиркор ҳокимликдан шундай 10 та уй қуриш учун ер майдони сўради ва бу мурожаат қаноатлантириладиган бўлди. Эндиликда у қурилиш ишларини бошламоқчи. Бу уйлар ҳозирги уйлардан бир неча баробар арзонга тушади.
Изоҳ (0)