Жиноят ишлари бўйича Тошкент шаҳар судида 12 январь куни аввалроқ Жасурбек Иброҳимовнинг вафоти ҳақидаги иш бўйича айбдор деб топилган ва олти йилга озодликдан маҳрум қилинган Исломбек Тўлагановнинг адвокатлари томонидан берилган апелляция шикояти бўйича эшитув бўлиб ўтди, деб ёзади «Nuz.uz».
Тўлагановнинг икки адвокати Иброҳимов олган жароҳатлари туфайли эмас, балки вақтида кўрсатилмаган тиббий ёрдам сабабли вафот этганини даъво қилди. Уларнинг сўзларига кўра, агар марҳум касалхонага тушган биринчи куниёқ операция қилинганида, тирик қолган бўларди. Бундан ташқари, улар биринчи кунлари беморга кучли таъсир қилувчи оғриқсизлантирувчи дорилар укол қилинганига эътибор қаратди.
Исломбекнинг отаси Абдужалил Расулов ўз ўғлини тўлиқ оқлади ва судга ўша муштлашувда Исломбекнинг ўзи ҳам жабрланганини эслатди, шунингдек, ўғли жиноятни амалга ошириш чоғида вояга етмаган бўлганлигига диққат қаратди.
Бу даъволарнинг барчасига Жасурбек Иброҳимовнинг бувиси жавоб қилди. Судга мурожаат қилиб, у туман суди фақат бир кишини айбдор деб топиб, қолганларни гувоҳлар сифатида сўроқ қилиб, адолатсиз қарор чиқарганини айтди. Унинг сўзларига кўра, ҳозир уларнинг оиласи қандай, Исломбек Тўлагановнинг оиласи қандай талафот кўрганини таққослаб ўтириш бутунлай ноўрин.
Шаҳар суди апелляция шикоятини конституциявий тартибда кўриб чиқиб, ҳукмни ўзгаришсиз қолдириш ҳақида қарор чиқарди. Яъни Тўлагановнинг адвокатлари тақдим этган далиллар биринчи инстанция суди томонидан чиқарилган ҳукмни ўзгартириш учун етарли даражада жиддий эмас, деб топди. Шу билан бирга, ишда бир қанча зиддиятлар топилди, бу эса Жасурбек Иброҳимов ётган баъзи тиббиёт муассасалари шифокорлари хатти-ҳаракатларига нисбатан прокурор текшируви белгиланишига сабабчи бўлди.
Эслатиб ўтамиз, Миробод туман суди 30 октябрь, душанба куни Боровский номидаги тиббиёт коллежи ўқувчиси Жасурбек Иброҳимовнинг ўлими юзасидан Исломбек Тўлагановни олти йилда озодликдан маҳрум этиш бўйича ҳукм чиқарган эди.
Изоҳ (0)