Мактабгача таълим вазирлиги Тошкентнинг Учтепа туманидаги болалар боғчаси тарбиячиси томонидан болага нисбатан қўпол муносабатга эътибор қаратди, деб ёзади «Газета.uz». Ҳодиса акс этган видео Facebook ижтимоий тармоғида тарқалган эди.
11 январь куни Мактабгача таълим вазири Агрепина Шин мактабгача таълим муассасалари фаолияти бўйича масъул идоралар ҳамда воқеа юз берган 20-мактабгача таълим муассасаси мудираси, тарбиячилари ва тарбияланувчиларнинг ота-оналари билан тезкор йиғилиш ўтказган.
Маълум бўлишича, 2017 йил апрелида ишга олинган тарбиячи болаларга жуда қўпол муносабатда бўлган (сўккан, жисмоний куч ишлатган, қўрқитган, масхара қилган), илгари ҳам ота-оналардан у ҳақда шикоятлар тушган.
Тарбиячидан қўрққан болалар боғчадаги воқеани ҳеч кимга айтмаган. Далиллар йўқлиги ва тарбиячининг қариндошлари томонидан мудирага босим ўтказилиши туфайли, муаммо ечилмай қолаверган.
Шунда мудира гуруҳларга видеокузатув камераларини ўрнатган. 8 январь куни тарбиячи 6 ёшли болани қаттиқ итариб юборган, бола деворга урилиб, йиқилган. Қўрқиб кетган тарбиячи боланинг ота-онасига қўнғироқ қилиб, у тез югураётиб йиқилиб тушганини айтган.
Мудирага шикоят қилган ота-онага у камера ёзувини кўрсатган. Ота-она видеони ички ишлар органларига кўрсатиш учун телефонга ёзиб олган, сўнг видео ижтимоий тармоқларда тарқалган.
Мактабгача таълим вазири раҳбарлигидаги комиссия тарбиячи билан тузилган меҳнат шартномасини 10 январь куни тугатди. Боғча мудирасига эса ҳайфсан эълон қилинди.
Изоҳ (0)