Бойсунда қўй жунидан инсон учун фойдали модда олиш йўлга қўйилади

«Бойсун-фарм» эркин иқтисодий зонасида қўй жунидан фармацевтика саноати учун ноёб хом ашё — ланолин субстанциясини ишлаб чиқариш йўлга қўйилади. Бу ҳақда ЎзА хабар бермоқда.

«Бойсун-фарм» эркин иқтисодий зонаси раҳбари М.Очиловнинг сўзларига кўра, бу модда саноқли давлатлардагина ишлаб чиқарилади. «Бойсун туманида ҳам сифатли, арзон ланолин субстанциясини ишлаб чиқариш учун етарли хом ашё мавжуд», — дейди зона раҳбари.

Маълумки, қўй териси остидаги безлар нафақат ёғ, балки ёғсимон модда – ланолин ҳам ишлаб чиқаради. Тери устига чиққан ёғ орқали ушбу модда қўй жунига ёпишади. Махсус технология ёрдамида ювилган жундан ланолин ажратиб олиниб, ҳидини кетказиш учун қайта ишлов берилади.

Хорижда бу жараённи яқиндан ўрганиб келган ўзбекистонлик тадбиркорлар Бойсунда замонавий технология ўрнатиш истагини билдирган. Ҳозирда унинг бизнес-лойиҳаси тайёрланмоқда. ЎзАнинг ёзишича, бу чиқитсиз технология бўлиб, ланолини ажратиб олинган жундан халқ хўжалиги учун кигиз тўқилади.

«Мутахассисларнинг фикрича, ланолин инсон терисига тез шимилиш хусусияти билан фармацевтика ва парфюмерия саноати учун зарур хом ашё ҳисобланади. Шу боис ундан фармацевтикада шамча ва суртмалар тайёрлашда бириктирувчи модда сифатида кенг ишлатилади», — деб ёзади агентлик.