Ўзбекистон Президенти Шавкат Мирзиёев Янгийўл шаҳридаги «Файзли» маҳалла фуқаролар йиғинида бўлди, деб хабар берди Президент матбуот хизмати.
Фото: Президент матбуот хизмати
Шу ерда Янгийўл шаҳрининг бош режаси лойиҳаси, шаҳардаги кўп қаватли уй-жойларни таъмирлаш дастури ҳамда хусусий уй-жой мулкдорлари ширкатлари фаолиятини замонавий технологиялар асосида такомиллаштириш тўғрисида маълумот берилди.
Янгийўл шаҳрида 86 минг 800 нафар аҳоли истиқомат қилади. 241 та кўп қаватли уйлар бўлиб, уларга хусусий уй-жой мулкдорлари ширкатлари хизмат кўрсатади.
Ўзбекистон Президентига тақдим қилинган лойиҳаларда шаҳарда оқова сув тармоқларини реконструкция қилиш ва янгилаш дастури, Тошкент вилоятининг Қибрай ва Зангиота туманларида сув таъминотини яхшилаш, Чирчиқ шаҳрининг иссиқлик тизимини такомиллаштириш каби маълумотлар ўрин олган.
Давлат раҳбари «Файзли» маҳалласи профилактика инспектори уйида бўлди. Аҳоли билан мулоқот қилди.
Шавкат Мирзиёев Янгийўл шаҳридаги мавжуд кўп қаватли уйларни тўлиқ таъмирлаш, 7 қаватли 12 та янги кўп қаватли уй-жой, замонавий боғ, бозор, супермаркет, кўприк қуриш бўйича мутассаддиларга топшириқ берди.
