Қадимий, аммо бугунга қадар мавжуд бўлган 15 шаҳар

Шаҳарлар бундан 5-6 минг йиллар муқаддам вужудга келган. Қадимги дунё тарихида донг таратган буюк шаҳарларнинг кўпчилиги йўқ бўлиб кетган. Аммо уларнинг баъзи бировлари бугунги кунга қадар ҳам мавжуд бўлиб, туристларнинг севимли саёҳат ҳудудларига айланиб қолган.

Novate сайти вужудга келиши узоқ ўтмишга бориб тақаладиган, аммо бугунгача мавжуд бўлган ана шундай шаҳарлардан 15 таси ҳақида қисқача маълумот тақдим этди.

Балх, Афғонистон: милоддан аввалги 1500 йиллар

Номи юнон манбаларида Бактра деб тилга олинадиган шаҳар ҳудудида илк одамлар 3,5 минг йиллар муқаддам ўрнаша бошлаган. Шундан буён тузилган кўплаб давлатларнинг пойтахти ёки марказларидан бири мақомида юрган бу шаҳар араб манбаларида «Шаҳарлар онаси» деб аталади. Бугунги кунда у илгаригидай йирик ва замонавий шаҳар эмас, лекин, шунга қарамай, тарихий муҳитни сақлаб қола олгани билан диққатга сазовордир.

Киркук, Ироқ: милоддан аввалги 2200 йиллар

Бу шаҳар бобилликларни, мидияликларни кўрган ноёб тарих даракчисидир. Шаҳар Бағдоддан 240 километр узоқликда жойлашган бўлиб, нефть саноати марказларидан бири саналади.

Арбил, Ироқ, милоддан аввалги 2300 йиллар

Арбил қадимдан савдо-сотиқ маркази бўлиб келган. Форслардан тортиб туркларгача ушбу шаҳарга эгалик қилиш учун курашган. Шунингдек, Арбил Буюк Ипак Йўлининг муҳим марказларидан бири ҳам эди.

Сур, Ливан, милоддан аввалги 2750 йиллар

Сур ҳам ўзининг қарийб 5 минг йиллик тарихи мобайнида кўплаб халқлар ва империяларни кўрди. Милодий 64 йилда у Рим империяси тарафидан забт этилди. Ҳозир у дунёнинг энг гўзал туристик шаҳарларидан бири ҳисобланади.

Қуддус, Исроил: милоддан аввалги 2800 йиллар

Яқин Шарқ ва бутун дунёнинг энг машҳур шаҳарларидан бири бўлмиш Қуддус жаҳоннинг уч дини вакиллари учун муқаддас даргоҳ ҳисобланади. У ерда яҳудийларнинг, христианларнинг ва мусулмонларнинг муборак қадамжолари бор. Худованд тобути ибодатхонаси, ал-Ақсо масжиди шулар жумласидандир. Тарихи давомида Қуддус 23 марта қамал қилинган, унга 52 ҳужум амалга оширилган. Бундан ташқари, у икки марта бутунлай вайрон этилган ва қайта тикланган.

Байрут, Ливан: милоддан аввалги 3000 йиллар

Беш минг йиллик тарихга эга Байрут нафақат туристик манзилгоҳ, балки Ливаннинг маркази ва шиддат билан ривожланаётган замонавий шаҳар ҳамдир. У мамлакатнинг пойтахти ва айни пайтда иқтисодий ва маданий марказидир.

Ғозиантеп, Туркия: милоддан аввалги 3650 йиллар

Бошқа қадимий шаҳарлар сингари, Ғозиантеп ҳам кўплаб босқинлар, ривожланиш ва қулашларни бошдан кечирган. Бугунги кунда эса у Туркиянинг энг диққатга сазовор кўҳна манзилгоҳларидан бири ҳисобланади.

Пловдив, Болгария: милоддан аввалги 4000 йиллар

Болгариянинг Пловдив шаҳри 6000 йилдан буён ўз ўрнида собит турибди. У Фракия таркибида бўлди, римликлар ва Усмонлилар томонидан эгалланди. Шу боис унда турфа тарихий ёдгорликларни топиш мумкин, масалан, турк ҳаммомларини ва Рим услубидаги меъморий обидаларни.

Сайда, Ливан: милоддан аввалги 4000 йиллар

Сайда шаҳрида Александр Македонский, Исо Масиҳ бўлган. Унинг ҳудудидаги энг эски ёдгорлик бўлмиш финикияликлар манзилгоҳи бугунги кунга қадар мавжуд.

Ал-Фаюм, Миср: милоддан аввалги 4000 йиллар

Ал-Фаюм Қадимги Мисрдаги Крокодилополис шаҳрининг тарихий қисмидир. Бу шаҳар аҳолиси Пецухос номли тимсоҳга топинган. Унга яқин ҳудудда пирамидалар ва маданий марказ жойлашган.

Шуш, Эрон: милоддан аввалги 4200 йиллар

Юнон манбаларида Суза деб аталадиган бу шаҳар ўз вақтида Эламнинг маркази, Аҳамонийлар салтанатининг марказларидан бири бўлган. Ҳозир бу митти шаҳарда 65 минг киши истиқомат қилади. Ваҳоланки, у Эрон тарихидаги энг йирик шаҳарчилик марказларидан бири бўлган.

Дамашқ, Сурия: милоддан аввалги 4300 йиллар

Дамашққа таъриф бериш ортиқча бўлса керак. Қадимги дунёнинг энг йирик шаҳарларидан бири ўрта асрларда араб халифалигининг пойтахтига айланди. Бугунги тарихчилар уни дунёдаги энг қадимги тирик шаҳар деб атайди.

Halaб, Сурия: милоддан аввалги 4300 йиллар

Halaб, бошқа кўплаб қадимги шаҳарлардан фарқли равишда, бугунги кунда ҳам йирик мегаполис мақомини сақлаб қолган эди. Сурияда фуқаролик уруши бошлангунига қадар унинг аҳолиси 4,4 миллион кишини ташкил қиларди.

Библ, Ливан: милоддан аввалги 5000 йиллар

Финикияликлар бу шаҳарни Гебал деб атаган. Библ номини эса унга юнонлар берган.

Иерихон, Фаластин: милоддан аввалги 9000 йиллар

Иерихон бугунги кунда мавжудлигини сақлаб қолган энг қадимги шаҳардир. Унинг ҳудудида илк бор одамлар 11 минг йил олдин жойлаша бошлаган. Ҳозир у ерда 20 минг киши яшайди.