Жиззах вилоятида Президент фармонига мувофиқ афв этилган 13 нафар турли диний оқим ва террорчилик гуруҳларига билиб-билмай қўшилиб қолган фуқаролар учун вилоят ҳокимлиги томонидан ўзига хос экскурсия ташкил этилди. Бу ҳақда ҳокимлик расмий сайтида хабар берилди.
«Инсон ҳаётда баъзан-билиб билмай хато қилади. Оқибатда ўзи билан бирга оиласи, яқинларини ҳам азиятга қўяди. Ана шундай пайтда адашганларни кечира билиш, уларга тўғри йўл-йўриқ кўрсатиш чинакам ўзбекона фазилат. Аслида ҳам инсон қилган хатосини тушуниб етиши – асосий мақсад», — дейилади хабарда.
Экскурсияда Жиззах шаҳрининг бугунги кўркам қиёфаси иштирокчиларнинг ҳайратини оширгани рост. Хусусан, Жиззах эркин иқтисодий зонасида тадбиркорликка берилаётган эътибор ва бу ерда ишлаб чиқарилаётган маҳсулотларнинг сифати, ишчиларнинг меҳнат шароити билан иштирокчилар яқиндан таништирилди.
— Пайвандчилик билан шуғулланар эдим. Нима бўлди-ю, тўғри йўлдан адашдим! Турли хил бузғунчи гуруҳлар домига тушиб, 2010 йилда 8 йилу 6 ойга озодликдан маҳрум этилдим, — дейди Жиззах шаҳри «Жиззахлик» маҳалласида яшовчи Отабек Жўраев. — Ёшлик қилиб, оқибатини ўйламасдан шу йўлга кирганимдан юракдан пушаймон бўлганим учун Президентимиз фармони билан афв этилиб, оилам бағрига қайтдим. Ёлғиз ўғлим дея кутган онажонимнинг бугун бағри тўлди, соғинган фарзандларим ота меҳрига қонди. Бунинг учун давлатимиз ҳамда Ҳурматли Президентимиз Ш.Мирзиёевга минг бор ташаккур айтиб, мамлакатимизнинг ривожи йўлида бор куч-ғайратим билан ишлашга ваъда бераман.
— Муҳтарам Юртбошимиз томонидан афв этилган юртдошларимиз жамиятнинг ажралмас бир бўлаги эканлигини ҳис қилаётганлари, содир этган қилмишларига астойдил пушаймон эканликлари шубҳасиздир. Зотан, шундай пайтларда Ватан, ҳурлик, оила деган олий қадриятлар янада тўлақонли англаб етилади, — дейди Жиззах вилоят ҳокимининг жамоат ва диний ташкилотлар билан алоқалар бўйича ўринбосари Э.Исматов.
Изоҳ (0)