Бегоналар билан суҳбатлашиш нима учун фойдали?
Ўзи танимаган инсонлар билан мулоқотда бўлган одамнинг кайфияти кўтарилади, мияси яхши ишлай бошлайди, дейишмоқда тадқиқотчилар. Лекин, биз жамоат транспортида бегоналардан кўзимизни олиб қочишга ҳаракат қиламиз, йиғинларда фақат ўзимиз таниганлар билан суҳбатлашишни афзал биламиз, қўшнимиз салом берса ҳайрон қоламиз.
Бегоналар билан гаплашиш биз учун ноқулай ва қийин бўлиб туюлади. Бу суҳбатнинг менга ҳам, ўша бегона одамга ҳам қизиғи йўқ деб, ўзимизни олдиндан ишонтирамиз. Калифорния университети психологи Жулиана Шрёдер бундай ҳолатни «умумий билмаслик феномени» деб атайди, яъни ҳамма гаплашишни хоҳламаётгани учун гаплашмаяпти, деб ўйлаб, сиз ҳам бегоналар билан гаплашмай қўя қоласиз, аслида, сиз ҳам, бошқалар ҳам суҳбатга мойил. Бу истиҳола сизни ёлғизликка ундайди. Лекин, Шрёдернинг фикрича, ёлғиз қолгандан кўра, бегоналар билан мулоқотда бўлиш кўпроқ яхши туйғуларни келтириб чиқаради.
Тадқиқотчилар жамоат транспортидаги йўловчиларнинг эмоционал ҳолатини ўрганишди: бошқа йўловчилар билан гаплашиб кетганлар жим кетганлардан кўра кўпроқ ижобий таассуротлар орттиришган, бу нарса суҳбат қуришни хоҳлаган йўловчигф ҳамсуҳбат бўлган кишида ҳам акс этган.
«Қисқагина бўлса ҳам самимий суҳбат инсонда одамлар жамоасида яшаётганлик, бошқалар билан бирдамлик ҳиссини беради» – дейди Эссекс университети психологи Жиллиан Сендсторм.
Юқоридаги фикрлардан бегоналар билан мулоқот қилишнинг руҳий ҳолатимиз учун фойдали эканлигини тушуниб олдик. Энди бу мулоқотнинг мия фаолияти учун қандай фойдалари борлиги ҳақида билиб оламиз.
Яна бир тадқиқот натижасида, инсон ким биландир қисқа вақт бўлса ҳам мулоқотда бўлганда, бош миясининг ақлий жараёнларни таъминловчи бўлимларининг фаолияти яхшиланиши аниқланган. Натижада инсоннинг диққатни жамлаш, режалаштириш, ташкиллаштириш каби ақлий қобилиятлари ошиши кузатилган.
Тадқиқот жараёнида уч гуруҳга бўлинган одамлар ўрганилган. Биринчи гуруҳдагилар бир-бирлари билан танишиб, 10 минут давомида ижобий суҳбат қуришган, иккинчи гуруҳдагилар баҳслашишган, учинчи гуруҳдагилар жим ўтиришган. Кейин барча иштирокчиларнинг ақлий қобилиятлари тест орқали текшириб кўрилган. Биринчи гуруҳ аъзолари энг яхши кўрсаткичларга эга бўлишган.
Кундалик ҳаётимизда ҳар куни бегона одамлар билан суҳбатлашишга имконият топсак бўлади. Жамоат транспортида, дўконда, умумий овқатланиш жойларида, учрашувлар ва йиғилишларда ва ҳоказо... Асосийси, бегоналар билан мулоқотга киришишни чин кўнгилдан хоҳлаш ва буни одат тусига киритишдир.
Манба: «Woman.ru»
