Аргентина Ташқи ишлар вазирлиги мамлакат ҳукумати Испаниянинг ҳудудий яхлитлиги сақланиб қолишига ва Испаниядаги қонуний тартиб тинч йўл билан қайта тикланишига умид қилаётганини маълум қилди. Бу ҳақда «Коммерсантъ» хабар бермоқда.
«Аргентина ҳукумати Каталония парламенти томонидан мустақиллик эълон қилинишини тан олмайди ва рад этади», — дейилади Аргентина ТИВ сайтида эълон қилинган баёнотда.
Мексика ташқи ишлар вазири Луис Видегарай ҳам тахминан шундай баёнот билан чиқиш қилди. Унинг қайд этишича, «мураккаб тарихий низо» ечими «куч эмас, балки далиллар воситасида» топилиши лозим.
Туркия ташқи сиёсат идораси ҳам Каталония парламенти томонидан мустақиллик эълон қилинганини қоралади. ТИВ баёнотига кўра, Каталония парламентининг бу қарори Испания Конституциясига зид.
«Дўстимиз ҳам иттифоқчимиз ҳисобланган Испания бу синовга бардош бера олишига шубҳамиз йўқ. Туркия ҳукумати Испания раҳбариятининг бу йўналишдаги ҳаракатларини қўллаб-қувватлайди», — дейилади турк вазирлиги баёнотида.
Аввалроқ мустақиллиги қисман тан олинган Жанубий Осетия ва Абхазия Каталония мустақиллигини тан олиш масаласини кўриб чиқишга тайёрлигини билдиргани ҳақида хабар берилган эди.
Изоҳ (0)