Ироқ ҳарбийлари Ал-Қоим шаҳри яқинидаги беш қишлоқ, темирйўл бекати ва электростанцияни ИШИД террорчилик ташкилоти жангариларидан озод этди. Бу ҳақда «РИА Новости» хабар бермоқда.
Хабарларга кўра, Ироқ армияси бўлинмалари ва халқ кўнгиллилари Ан-Назва, Ан-Ноҳия, Ал-Амарий, Ат-Тазалия ва Ратажа қишлоқларини озод қилган.
Генерал-лейтенант Абдуламир Яроллоҳнинг қўшимча қилишича, қўшинлар Ал-Ҳур кўприги, Ал-Қоим темирйўл станцияси, темирйўл таъмирлаш заводи, маҳаллий электростанция, АЁҚШ ва Ал-Машария тумани устидан назорат ўрнатган.
Шиа кўнгиллилари матбуот хизмати ахборотига кўра, жангчилар Ал-Қоим марказидан беш километр масофада турибди ва уни штурм билан эгаллашга тайёр. Маълумотларга кўра, штурм арафасида ташкил этилган хавфсизлик коридорлари орқали юзлаб оилалар шаҳарни тарк этиб улгурган.
Ироқ бош вазири Ҳайдар ал-Ободий Ал-Қоим ва Рава шаҳарларини озод қилиш бўйича операция бошланганини эълон қилиб, бу шаҳарларни ИШИДнинг Ироқдаги сўнгги таянчлари деб атаган эди.
Изоҳ (0)