Жорий йилнинг 10—17 октябрь кунлари Буюк Британиянинг Брэкон шаҳрида қўшин разведкачилари ўртасида бўлиб ўтган «Кембрия патрули» халқаро танловида Ўзбекистон вакиллари ҳам муносиб иштирок этди. Бу ҳақда «Telegraf.uz» хабар бермоқда.

Фото: «Telegraf.uz»

Ўзбекистон Республикаси Мудофаа вазирлиги матбуот хизматига кўра, мусобақада 29 мамлакатдан 139  жамоа қатнашди. Унда Ўзбекистон қўшин разведкачилари билан бирга Арманистон, Бирлашган Араб Амирликлари, Молдова ва Филиппин ҳарбий хизматчилари ҳам илк бор қатнашди.

Қарийб 40 йилдан бери ўтказиб келинаётган «Кембрия патрули» танлови энг қийин ва нуфузли мусобақалар сирасига киради. Танловда ҳарбий хизматчиларнинг жисмоний тайёргарлигига алоҳида эътибор қаратилиши туфайли махсус бўлинмаларга қабул қилиш жараёни билан қиёсланади.

Кембрия тоғлари жуда оғир иқлим шароити билан ажралиб туради. Кундузи қуёш деярли кўринмайди, ҳар замон ёмғир шиддат билан ёғади, ҳудуди ботқоқлик ва ўрмондан иборат, ўтишга қийинчилик туғдиради. Шу боис танловда иштирок этаётган кўплаб жамоалар финалга етиб бора олмай, мусобақани тугашидан олдин тарк этишади.

Унда иштирокчилар қурол-аслаҳаларни тақиб, навигация воситаларисиз Кембрия тоғлари бўйлаб етакчилик қобилияти, амалий кўникмаси ҳамда руҳий ва жисмоний қувватини синовдан ўтказиб, 25 килограмм юк билан 65 километр масофага пиёда марш юриш, 1000 метрдан юқори баландликлар ва 750 метр пастликлардан ўтишни амалга оширади.

Марш юриш давомида ҳар бир жамоа тоғли ва сув тўсиқларидан ўтиш, ҳудуд разведкасини олиб бориш,  шартли душман жойлашган ҳудудни аниқлаш ва уларни йўқ қилиш бўйича ўқув-жанговар операцияларни амалга ошириш, шартли ярадорларга биринчи тиббий ёрдам кўрсатиш, ноқонуний кучлар томонидан гаровга олинганларни озод этиш, мураккаб тоғли ҳудудларда пистирмаларни ташкил этиш каби вазифаларни бажарди.

Танлов якунига кўра, Ўзбекистон Республикаси Мудофаа вазирлиги қўшин разведкачиларидан иборат жамоа, биринчи бор мазкур мусобақада иштирок этишига қарамай, Италия жамоаси билан бирга иккинчи ўринни қўлга киритди (танлов шартига кўра, ҳар бир совринли ўрин икки жамоага берилади).

Шоҳсупанинг энг юқори поғонаси ва учинчи ўрин 111 та жамоа билан иштирок этган Буюк Британия ҳарбийларига насиб этди.