Европа Чемпионлар Лигасининг «А» гуруҳида кураш олиб бораётган «Манчестер Юнайтед» футбол клуби учинчи ўйиндаги учинчи ғалабасини қўлга киритди.
Жозе Моуриньо ўзининг шогирдларидан бири бўлган Руй Патрисиу бошқарадиган «Бенфика» меҳмони бўлиб, Маркус Рэшфорднинг ягона голи сабаб зафар қучди — 1:0. Бунгача «қизил иблислар» кетма-кет икки йирик ғалабани қўлга киритганди.
Шу куни «Бенфика» бош мураббийи 1999 йилда таваллуд топган дарвозабон Миле Свиларни майдонга туширди. Бу Чемпионлар Лигасида тўп сурган энг ёш дарвозабон бўйича Икер Касильяснинг рекордини янгилаш эди. Гол ҳам айнан тажрибасиз посбоннинг хатосидан сўнг «Бенфика» дарвозасига киритилди.
Мавсумни АПЛда 5-ўринда якунлаган ва Европа Лигасидаги ғолиблиги эвазига Чемпионлар Лигасига қайтган «Юнайтед» плей-офф учун катта қадам ташлай олди. Иккинчи давранинг 2 та ўйини «Олд Траффорд»да ўтиши инобатга олинса, Моуриньо жамоаси бу борада муаммога дуч келмаслиги катта эҳтимол.
Гуруҳ босқичини «Бенфика» майдонидаги ғалаба билан бошлаган Москванинг «ЦСКА» клуби 2-турда «Юнайтед»дан 4 та гол ўтказиб юборганди. «Армиячилар» бу сафар ўз майдонларида «Базел»га ҳам имкониятни бой берди — 0:2.
Бир кун олдин Москванинг бошқа бир клуби «Спартак» Испаниянинг «Севилья» клуби постига 5 та гол уриб, россиялик футбол мухлисларини самога олиб чиққанди. Бир кун ўтиб эса «ЦСКА» уларни ўша самодан пастга олиб тушди.